Nia dehan, enkontru ho Prezidente Repúblika hafoin halo nia vizita ofisiál no vizita Estadu ba Vatikanu hodi hasoru Papa Francisco no iha enkontru ne'e Xefe Estadu atualiza mós ba Mgr Sprizzi kona-ba importánsia husi vizita ne’e.
"Ita seidauk bele konfirma data loloos, tanba ne'e sei anunsia husi Santa-Sé juntamente ho governu Timor Leste,” dehan nia, iha Palasiu Prezidensiál, Bairru-Pité, horisehik.
La'ós ona segredu maibé iha ona preparasaun ba possivel Papa Francisco nian ne'ebé timoroan hotu-hotu hein no presiza servisu makaas. Governu timorenese halo hela preparasaun exelente no simu delegasaun husi Vatikanu iha loron hirak liu ba ne'ebé hela iha Timor loron tolu nia laran hodi halo survey ba fatin hotu-hotu ne'ebé durante vizita Papa Francisco nian sei ba.
Nia hatutan, eventu hotu-hotu ne'ebé sei akontese iha vizita Papa ne'e povu timorenese nu'udar konvidadu ne'ebé sei partisipa no halo ona reuniaun barak ho ekipa governu nian ho ministériu oioin ne'ebé lideradu husi Primeiru Ministru no delegasaun husi Vatikanu presionadu ka orgullu ho servisu ne'ebé governu Timor-Leste halo kona-ba preparasaun atu simu Papa Francisco nia vizita nian.
"Ha'u hakarak agradese hodi Santa-Sé nia naran ba Estadu Timor Leste, Prezidente Repúblika, Primeiru Ministru, no ministériu hotu-hotu ba servisu sira kompetente, exelente no efisiente ne'ebé feitu nu'udar preparasaun ba eventu vizita Papa Francisco," hatete nia.
Nia afirma, vizita Santu padre Papa Francisco nian nu'udar vizitante estadu mas prinsipalmente ne'e nu'udar vizita pastorál, hanesan pastor ne'ebé mai vizita nia povu.
Nia informa, primeira preokupasaun ne'ebé Santu padre Papa Francisco iha mak oinsá povu bele hasoru nia no nia bele hasoru povu. Iha país hanesan Timor Leste iha ne'ebé mundu tomak hakarak hasoru Papa Francisco to'o maun alin sira husi relijiaun seluk ne'ebé hakarak partisipa iha festa povu nian ne'e mak tenke garante seguransa, saúde, transporte no fatin ne'ebé dignu ho kondisaun dignu mós atu ema hotu bele partisipa ho di'ak iha eventu sira no missa ne'ebé Santu padre mak sei prezide.
Nune'e, preokupasaun seluk mak liga ho konsikuensia sira tanba ne'e presiza organiza ho di'ak no efesiente para Papa Francisco bele iha espasu livre ba deskansa hodi rekupera enérjia atu bele iha sorumutu sira ho forsa fízika, intelektual, nune'e bele fó ho másimu ba povu. Laiha tan preokupasaun seluk, iha konfiansa katak Santu padre Papa Francisco koñese besik liu povu Timor no iha domin bo'ot ba Timoroan sira no ba nasaun ida ne'e.
"Papa Francisco iha espetativa no ho ksolok prepara nia vizita," esplika nia.
Molok ne'e, Primeiru Ministru Kay Rala Xanana Gusmão informa, reuniaun Konsellu Seperiór Defeza no Seguransa (KSDS) diskute mós kona-ba preparasaun atu simu Papa Fracisco ne’ebé sei mai Timor iha fulan Agostu 2024, tanba ne’e Prezidente Repúblika José Ramos Hirta husu ba governu no membru KSDS atu buka koordena ba malu hodi prepara daudaun kondisaun sira liu-liu seguransa nian.
Nia dehan, ikus liu ko'alia kona-ba preparasaun atu simu Papa Francisco, ne'ebé hanesan imi hatene iha komisaun ida ne'ebé mai husi Vatikanu ko'alia mós ho komisaun ne'ebé governu forma iha Timor no komisaun rua ne'e hala'o daudauk servisu balun.
“Papa Francisco sei mai iha Fulan Agostus, hanoin katak ita iha tempu naruk atu halo buat hotu ne'ebé komisaun dehan tenke halo ida ne'e no halo ida ne'eba liu-liu tanba Papa Francisco idade ona no Papa Francisco mai ne'e iha fatin haat kedas, dala uluk iha Papua New-Guine, Timor Leste, Singapura, no Jakarta ne'ebé Xefe Estadu husu ba governu no husu ba membru KSDS atu buka koordena ba malu hodi prepara daudaun kondisaun sira liu-liu seguransa nian,” informa PM Xanana Gusmão ba jornalista sira hafoin remata reuniaun KSDS dahuluk iha Palasiu Prezidensiál Bairu-Pite, Kinta (08/02).
Nia hatete, iha Maiu komisaun husi Vatikanu sei mak tan, mai atu haree, Timor halo ona saida relasiona ho Papa nia vizita mai Timor Leste.
Antes ne’e, Prezidente Repúblika José Ramos Horta hatete, foin fila husi viajen ida naruk hahú iha Roma, sidade Vatikanu hamutuk ho amu Papa, vizita ofisiál, vizita estadu ba amu Papa ko'alia asuntu barak, asuntu internasionál oi-oin, amu Papa preokupa Horta, no mós ko'alia kona-ba amu Papa nia vizita mai Timor Leste ne'e láos novidade ona, delegasaun Santa-Se mai iha Timor semana ida liu ba ne'e atu haree lójitika, infraestrutura, seguransa buat sira ne'e.
"Ha'u labele ko'alia sai bainhira loos mak amu Papa mai Timor Leste ne'e mak Santa-Se mak sei fó hatene sai, sintunia ho Igreja no Governu. Ha'u hatete de'it agora buat sira ne'e hotu-hotu konfirmadu amu Papa sei mai duni, ita reza de'it amu Papa nia saúde kontinua di'ak," dehan nia.
