Diretora Rekursu Umanu no mós Prezidente Juri Bolsa Kandidata, Anita Tavares de Jesus hateten, aplikante hamutuk 8.601 mak submete ona dokumentu ba iha Ministeriu Edukasaun. Husi total ne’e kompostu husi feto 4.916 no mane 3.685.

Diretora rekursu umanu ne’e informa, husi totál 8.601 ne’e bele admitidu hotu ka bele mos la admitidu ba iha prosesu verifikasaun dokumentu.

"Tanba ne'e prosesu verifikasaun namanas hela, ME servisu hamutuk ho ONG BELUN, ne’ebé halo dadaun verifikasaun ba iha dokumentus ba kandidatus sira ne'ebé submete dokumentus mai," nia hateten.

Bainhira prosesu verifikasaun ne'e remata mak sei hasai lista ba aplikantes sira ne’ebé mak admitidu no sira ne’ebé la admitidu ho nia razaun sira.

"Depois de lista kandidatu admitidu no la admitidu sira remata mak ita sei fo sai ba publiku, sira admitidu tanba hanesan ne’e hanesan ne’eba, sira la admitidu ho razaun tanbasa, maibe parese sira la admitidu ne’e ho diploma sekundaria sira ne'e, maibe ita sei fo sai bainhira verifikasaun ne’e remata," dehan nia.

Nia informa, ba aplikantes sira ne'ebé mak admitidu, ME servisu ho komisaun funsaun publika entaun sei jere nia prosesu ba kalendariu teste. Tamba numeru aplikantes boot entaun sei halo teste por turnu. Maibe orariu hirak ne’e sei fo sai hamutuk ho lista ba kandidatu sira ne’ebé admitidu.

"Nune’e mos kona ba teste ne’e ita sei halo isimulasaun kona ba sistema. Nune’e kandidatu sira bele konhese sistema ne’e antes sira ba halo teste. Agora ita seidauk bele fo data loloos tanba ita sei halo hela verifikasaun. Depois de verifikasaun loos ona no hatene numeru ne’ebé mak admitidu foin ita bele halo orariu," tenik nia.

Entretantu, teste ne'e sei halao iha edifisiu KFP Matadoru, ne'ebé sei realiza husi ME no KFP. Enkuantu, vaga ne'ebé Ministeriu Edukasaun loke ba iha faze dahuluk ba de’it ensinu pre-primaria to’o ensinu baziku terseiru siklu hamutuk 2.400.