Objetivu husi partilla informasaun ne’e, atu fasilita lideransa feto iha nível suku hodi fahe esperiénsia, estratejia no reforsa malu, atu halo mudansa iha komunidade liuhusi diskusaun kona-ba estratejia dezenvolvimentu suku liga ho planu dezenvolvimentu nasionál ba iha suku.

Atividade ne’e realiza iha ambitu komemorasaun loron internasionál feto ho tema “Haforsa Knaar Lideransa Feto ba Atinji Igualdade Jéneru”, ne’ebé organiza husi Movimentu Feto Foisa'e Timor-Leste (Moffe-TL).

Reprezentante SEI, Xefe Departamentu Relasaun Públika, Herminio Xavier hatete, estratejia SEI kontinua nafatin ho ninia misaun Promove igualdade jéneru iha Timor-leste hamutuk ho parseiru sira.

"SEI nafatin orgullu ba ita-boot sira hanesan Xefe Suku, Xefe Aldeia, ita-sira hanesan feto ezemplár iha ita-nia sosiedade maske iha kompetisaun makas tebtebes liuliu mane sira kuandu besik ona elisaun sira mobiliza malu hodi halo movimentu no alerta iha públiku oinsa sira bele kompete," Dehan Reprezentante SEI liu husi komunikandu ne'ebé Online INDEPENDENTE sita, iha tersa (12/03/24).

Nia dehan, iha feto ezemplár sira na’in 18 konsege kombate mane lubuk ida, hodi bele asumi responsabilidade núdar Xefe Suku no Na'in 115 maka sai Xefe Aldeia, ne’e funu boot ida mak feto halo oinsa maka bele kompete ho maluk mane sira no liuliu atu sai lideransa iha  Suku no Aldeia sira.

Iha fatin hanesan, Diretora Ezekutiva MOFFE-TL, Yaçinta Luzinha hatete, maske loron internasional feto ne'e liu ona, maibe nafatin ho natureza ida selebrasaun loron feto ida ne’e hakarak halibur lideransa feto komunitáriu sira hanesan iha ne’e ita nia Xefe Suku Feto, Xefe Aldeia feto sira no mós Delegada no Reprezentante Juventude Feto.

Nia esplika, halibur Lideransa Feto Komunitariu sira liuliu loke hela espasu oinsa sira bele ko’alia hamutuk hanesan dialogu ida liuliu atu hato’o sira nia hanoin, sira nia esperiensia liga ho sira nia knaar hanesan Lideransa Feto Komunitáriu.

"Ba daruak ita mós hakarak haforsa sira-nia knaar no papél ne’ebé maka sira hetan ona liuhusi elisaun suku ne’ebé sira eleitu tinan kotuk liuliu atu sir abele haknar di’ak liu iha komunidade liga ho Planu Nasionál Dezenvolvimentu Suku nian," dehan Diretóra.

Sermonia Forum refere partisipa husi, Reprezentante husi Ministeriu Administrasaun Estatal, Prezidente CNJTL, Care Internasionál, Xefe Suku Feo, Xefe Aldeia Feto, Delegada no reprezentante juventude Feto husi Munisípiu Dili