Tuir Portavoz Ekipa Integradu husi Ministériu Saúde, Vidal de Jesus Lopes hatete, Iha fulan-Janeiru to’o fulan-Marsu konsege rejista kazu denge hamutuk 509, Chikungunya 192 no ZIKA 1.
“Kazu sira ne’e mak ha’u presiza relata bá públiku katak iha fulan-Janeiru to’o fulan-Marsu ne’e kazu ne’ebé ita rejista as liu mak dengue tuir fali mai mak 192 ZIKA 1, husi kazu sira ne’e munisipiu Dili mak númeru dengue as liu ho numeru 194 kazu,” dehan nia iha INFPM, tersa (12/03).
Antes ne’e, Diretor Servisu Saúde Munisípiu Bobonaru,Gil Bernardo Visente hatete, númeru ne’ebé sira rejista as liu iha Postu-Administrativu Maliana 52 kazu, Lolotoe 30, Bobonaru 5, Balibo 5 no Kailaku 4.
“Kazu denge iha fulan-Janeiru no fevereiru tinan ne’e ita rejista hamutuk 98, númeru kazu ne’e ita rejista as liu iha Postu-Administrativu Maliana tuir fali Lolotoe no tuir fali mai mak Bobonaru, Balibo no Kailaku,” dehan nia liu husi via telephone, segunda (04/03).
Servisu Saúde Munisipiu Bobonaru kontinua halo promosaun edukasaun saúde bá komunidade sira atu nune'e bele prevene husi moras Dengue, no promosaun ida ne'e saúde Munisípiu Bobonaru mós kopera ho autoridade lokál sira liuliu postu no autoridade munisípiu, atu nune'e mobiliza komunidade sira hodi halo limpeza jerál.
Entretantu, Dadus husi Servisu Saúde Munisípiu Ermera, hatudu hahu husi fulan-Janeiru to’o Fevereiru tinan ne’e, rejista moras ne’ebé a’as iha Sentru Saúde Internamentu Gleno maka hanesan Chikungunya 149, Dengue 34 no ZIKA ida.
Diretór Servisu Saúde Munisipal Ermera António de Deus Fátima hatete, saude munisípiu ermera preokupa tanbá tama ona ba tempu udan moras refere kontinua rejista ho númeru ne’ebé maka a’as tebes.
“Agora dadaun iha munisípiu ita hasoru hela problema boot ida tanba iha iha fulan rua deit ita rejista ona moras denge ho Chikungunya as liu Munisipiu Ermera, liuliu iha tempu udan, ita rejista hela moras dengue. Depois ita rejista Chikungunya 149, husi númeru ne’e, wainhira ita lori sampel ba halo teste iha laboratórium nasional 79 maka positivu, no ita hela 60 sample ne’e, seidauk halo teste tanba reajente laiha,” dehan nia iha timor plaza, kuarta (06/03).
Nia dehan, pasiente sira mai ho Chikungunya nia sintomas hanesan ho Dengue entaun sira halo hotu tratamentu iha sentru refere no la transfere ba Hospital Nasional Guido Valadares (HNGV).
