Hafoin simu pose, Embaixadór Timor-Leste Ba Kuba, Nivio Magalhães, agradese ba Xefe Estadu no  Primeiru-Ministru, Kay Rala Xanana Gusmão, ne’ebé depozita konfiansa hodi assume knar ida ne’e hanesan onra no previlejiu ida.

 Nune’e, nia sei asegura konfiansa hodi garantia interese estadu nian iha ne’eba.

Nia dehan, Kuba la’ós nasaun foun mai Timor-Leste, maibé sira, desde uluk kedas apoiu ona Timor nia luta, no bainhira restaura independensia, Kuba nuudar nasaun daruak ne’ebé estabelese relasaun diplomatatiku ho Timor.

“Responsabilidade ne’ebé ha’u simu sei kontinua relasaun servisu billateral ne’ebé antes ne’e estabelese ona, ita hotu hatene mediku lubuk ida formadu husi ne’eba, agora Brigada Mediku no Desportiva Kubana nian barak iha ne’e fó apoia ba ita, tanba ne’e ha’u sei kontinua hametin kooperasaun ida ne’e,” dehan, nia iha Palasiu Prezidensial, Bairru-Pité, kuarta (13/03).

Embaixadór ne’e informa, iha nia mandatu sei explora oportunidade foun iha área saúde nian no setór seluk ne’ebé bele benefisia ba povu.

“Ha’u sei dedika an tomak hodi hala’o knar foun ida ne’e, ha’u iha palavra ordem tolu, Hametik kooperasaun, Explorasaun oportunidade no Garantia reprejentasaun ho dignu,”tenik nia.

Palavra ordem tolu ne’e, Embaixadór sei kaer metin iha nia misaun durante hala’o knar iha Kuba.

Enkuantu, oras ne’e dadaun Nivio Magalhães, hala’o hela funsaun nudar Xefe Gabinete no Asesor prinsipal ba Vise-Primeiro Ministru, Ministru Koordenadór Assuntu Sosiais, Mariano ASSANAMI Sabino, nian.

Entretantu, iha serimonia pose ne’e, hetan partisipasaun masimu husi familia emposadu, diplomata no sira seluk tan.