Inisiativa kria Livru ne’e, Rede Feto Timor-Leste hetan apoiu husi Uniaun Europeia ho parseria Ajensia Dezenvolvimentu no Tulun Adventista Timor-Leste (ADRA-TL sigla inglésh).
Prezidente Konsellu Diretiva RFTL, Zelia Fernandes hatete, durante tinan barak halo ona advokasia ida forte ba iha prevensaun violensia Bazeia ba jeneru (VBJ) no Violensia Doméstika (VD) liu-husi dalan oin, maibé kazu VBJ no VD kontinua iha.
“Iha tinan barak nia laran ita halo advokasia ida forte tebes ba iha prevensaun violensia bazeia ba jeneru no violensia domestika, no iha enkuadramentu legal oioin iha ona, por-ezemplu hanesan lei kontra violensia doméstika depois ita iha mós projetu sira hanesan inisiativa spotlight ne’ebé atu kontribui ba iha violensia Bazeia ba jeneru, sosializasaun sira liu husi konferensia, seminariu sira ne’ebé barak tebes realiza ona ho hanoin atu kontribui ba prevensaun,”dehan Prezidente ba Jornalista sira iha Edifisiu RFTL, eis Obrigadu Barak Kaikoli, Tersa (05/11).
Tanba ne’e, Prezidente Rede Feto hatutan, ho hanoin ida katak, bainhira familia ida atu ba kazamentu sempre liu husi formasaun, nune’e, importate tebes atu integra ka koopera ho parte igreja nia programa kona-bá pre-kazamentu, atu nune’e bainhira familia sira tuir formasaun bele fasilita mós manual ne’e ba sira.
“Entaun ida ne’e interesante oinsa mak manual pre-kazamentu kombina entre valores relijiaun no valores familia ninian hametin familia kultural, entaun ita kombina valores rua ne’e par depois bele reforsa tan inisiativa prevensaun violensia Bazeia ba jeneru,” Prezidente RFTL hatutan.
Iha fatin hanesan, Sekretaria Estadu ba Igualidade, Elvina Sousa Carvalho hato’o apresiasaun ba RFTL ho parseriu sira ne’ebé lansa tan livru importante ida ne’ebé bele kontribui ba hamenus VBJ iha família.
“Tanba Bainhira atu hakat ba kazamentu, bainhira iha preparasaun no iha koñesimentu ne’ebé kle’an kona-bá direitu dever no iha koñesimentu kle’an konaba lei violensia bazeia ba jéneru, ha’u hanoin ida ne’e importante no dala ida tan apresiasaun bá igreja hodi hola parte, ita hamutuk hodi luta kontra violensia Bazeia ba jéneru tanba luta ida ne’e boot tebes,” dehan Governante ne’e.
Nia dehan, VBJ maioria komete husi parseiru vitima ka ema ne’ebé sira fiar, tau laran no ema sira ne’ebé tau konfiansa bá.
Entertantu, iha livru manual ne’e, iha topiku jeral neen mak hanesan, Motivasaun no espetativa moris hamutuk iha uma kain ida, Igualidade jéneru tuir prespektiva biblia, feto mane ápoiu malu iha uma kain, orsamentu familia, violensia doméstika no saúde produtiva.
