Primeiru Ministru Kay Rala Xanana Gusmão hatete, Governu sei esforsu an maka’as nafatin atu estabelese fronteiras terestre no marítimas ho indonezia. Tanba ida ne’e hanesan prioridade nasional ida.

“Ida ne’e prioridade nasional ida, la’so de’it atu kompleta funu naruk kona-bá soberania, maibé mós atu hetan seguransa jurídika no téknika kona-bá rekursu iha espasu marítimu, iha ita ninia jurisdisaun, no ida ne’e hotu sei permite mai ita atu implementa polítika ekonomia azul ne’ebé sustentavél,” dehan PM liu husi aprezentasaun Proposta OJE iha Parlamentu Nasional, Kuarta (06/11).

Xefe Governu hatutan, iha inisiu tinan 2025, governu formaliza ona adezaun ba Organizasaun Mundial no Komersiu (OMK), no tinan tuir mai Timor-Leste atu sai membru ASEAN.

PM Xanana dehan, iha organizasaun rua ne’e nia laran, merkadu foun no oportunidade foun sei nakloke ba Timor-Leste hodi ezije ba Timoroan hodi uza ho intelijensia no responsabilidade.

 Tanba iha tinan 2025 sei sai tinan ba implementasaun no sei la lakon tempu atu potensializa rekursu alternativus ba dezenvolvimentu Timor-Leste nian.

Entretantu, PM Xanana akresenta, Timor-Leste labele husik deit rekursu ne’ebé natureza fó ona, atu bele uza hodi dezenvolve no progride.

“Ita sei investe iha setor petróleo no rekursos minerais, liu husi investimento de 40,5 milhões de dólares, no ita sei avança ho desenvolvimento Greater Sunrise nian, ho investimento de 12 milhões de dólares,” hakotu nia.