Kompromisu ne’e hatudu liu husi sorumutu entre Embaixador Japaun iha Timor-Leste, Yamamoto Yasushi, ho Ministra Edukasaun, Dulce de Jesus Soares, iha sala VIP, Vila Verde, Kinta (09/04).
Yamamoto hatete, enkontru ne’e foka ba kontinuidade no expansaun programa edukasaun ne’ebé durante ne’e hetan apoiu husi governu Japaun.
"Ha'u foun, entaun ha'u hato'o ba Ministra Edukasaun Dulce de Jesus, relasiona ho programa sira ne'ebé durante ne'e implementa ona, liu husi apoiu finanseiru husi governu Japaun," dehan nia ba jornalista sira.
Nia mos revela katak Ministériu Edukasaun hato’o diretamente difikuldade sira ne’ebé agora daudaun enfrenta, hodi sai hanesan baze atu reforsa kooperasaun iha futuru.
"Entaun husi ne'e ha'u bele servisu hamutuk liu tan ho Timor-Leste hodi fó kontinuidade ba programa sira ne'ebé iha ona," katak nia.
Durante ne’e, Yamamoto hatutan, Japaun fó kontribuisaun signifikativu ba infraestrutura edukasaun ho konstrusaun eskola hamutuk 50 iha teritoriu nasionál.
La’ós deit infraestrutura, Japaun mós envia voluntáriu 25 ba Timor-Leste atu fó apoiu direta iha área edukasaun no dezenvolvimentu juventude.
Husi total ne’e, voluntáriu 15 servisu iha edukasaun – inklui ensinu baziku, matematika, edukasaun fizika no lian Japaun – no seluk servisu iha atividade juventude no área sosial.
Embaixadór ne’e hatutan, iha tempu besik governu Japaun sei apoiu foos ba programa merenda eskolár ba eskola 350.
Programa ne’e implementa liu husi programa UN Word Food Programme, ne’ebé sei kobre munisípiu Dili, Kovalima, Lautem no Baukau ho total orsamentu millaun $6.
Estudante Timor-oan 140 hetan bolsa estudu ba Japaun
Iha área rekursu umanu, Japaun kontinua oferese oportunidade bolsa estudu ba Timor-oan sira, liu-liu iha nivel ensinu superior no mestradu.
To’o agora, estudante Timor-oan hamutuk 140 mak partisipa ona iha programa bolsa, no balu desloka ona ba Japaun iha fulan Marsu liu ba.
Aleinde ne’e, funsionáriu públiku sira mós bele asesu ba bolsa liu husi programa JDS.
Maski nune’e, Yamamoto admite katak seidauk iha programa bolsa ba nivel ensinu sekundáriu.
Entretantu, Ministra Edukasaun, Dulce de Jesus Soares, apresia kooperasaun ne’e no konsidera katak apoiu husi Japaun importante tebes ba dezenvolvimentu edukasaun nasional.
Nia destaka kontribuisaun Japaun iha konstrusaun eskola no enviu voluntáriu ne’ebé ajuda reforsa kapasidade profesór no estudante sira.
"Entaun ita hakarak ita-nia profesór no estudante sira aprende buat balun husi sira. Tanba prosesu ne'e lao tinan-tinan, no ita halo ona kooperasaun ho sira hodi harii eskola hamutuk 50 iha teritoriu nasionál," katak nia.
