Prezidente Konsellu Diretiva RFTL, Zelia Farnades hatete, loja hakbiit ba feto Timor-Leste ne’e sai mehi ida bá Rede Feto ho nia membru sira hotu ne’ebé mehi ona Iha tinan barak nia laran.
Nia dehan, bainhira iha diskusaun nian, programa hakbiit feto ne’e importente tebes, tanba bainhira iha feto ida ho ekonomia independente, ne’e sai orgullu ida bá feto hodi kontribui bá foti desizaun atu kontra violensia sira ne’ebé akontese.
“Depois de prosesu naruk nia laran, ohin tempu to’o duni ita konsegue lansa loja ida ne’e,” dehan nia ba Jornalista sira iha Edifisiu RFTL eis Obrigadu Barak, Kaikoli, Tersa (05/11).
Prezidente Rede Feto hatutan, loja hakbiit feto ne’e la’os atu fa’an de’it produtu sira ne’ebé mai husi feto sira, maibé loja ne’e mós sai hanesan sentru ba informasaun, fatin ba diskusaun oinsa bele fahe esperiensia no bele aprende buat seluk husi maluk feto sira ne’ebé iha ona kapasidade, liuliu iha parte prosesamentu ba produtu agrikola sira atu projeta ba iha merkadu.
Nia esplika, RFTL nu’udar makina advokasia liu husi promove produtu inan-feto sira nian, ne’ebé mai husi grupu benifisiariu oioin iha área rural nian ba iha públiku, atu nune’e bele tulun inan feton sira nia produtu ne’ebé sira halo iha tempu barak nia laran.
Iha fatin hanesan, Embaixadór Uniaun Europeia iha Timor-Leste Marc Fiedrich hatete, nia parte senti kontenti hodi hasoru malu fali parseiru sira, tanba Uniaun Europeia hamutuk ho Sekretraia Estadu ba Igualidade (SEI) no RFTL hala’o ona asaun importante barak ba feto iha TL.
Nia dehan, iha okaziaun barak durante periodu ida ne’e, Uniaun Europeia hamutuk ho parseiru sira liu husi organizasaun ADRA-TL fó ona apoiu ba feto timoroan sira.
“Ami la’o dook ona desde periodu 2021 no ohin ita marka momentu ida bá atinjimentu sira husi projetu ida ne’e nian, projetu ne’ebé ha’u refere mak konserteja apoia husi Rede Feto, timoroan sira nu’udar ajente merkadu forte ne’ebé implemeta husi ADRA Timor-Leste no Rede Feto Timor-Leste,” dehan Embaixadór.
Iha biban ne’e, Sekretaria Estadu ba Igulaidade, Elvina Sousa Carvalho hatete, lansamentu ba loja hakbiit feto ne’e nu’udar esforsu ida ne’ebé durante ne'e hotu-hotu tau hanoin hamutuk husi parte governu ho Sosiedade Sivil no parseria sira.
Sekretariu Estadu ba Igualidade senti orgullu tebes bá eventu ida ne’e, senti orgullu bá feto maluk sira sira iha Rede Feto ne’ebé ho sira nia badinas no sira nia matenek buka meius atu apoiu feto maluk sira seluk liuliu iha empoderamentu feto.
