Diretór Jeral-SEI, Armando da Costa hatete, SEI iha atividade rua atu kapasita feto potensial sira ne’ebé atu kandidata an ba iha eleisaun suku, no atividade ne’e mak public speaking no viabiliza feto pontensial ne’ebé identifika ona.
Nia dehan, atividade ida public speaking ne’e mak oinsa SEI prepara sira hodi hato’o sira nia programa no material, no iha momentu ne’ebé hanesan SEI mós halo deziminasaun no sosializasaun promosaun ba komunidade, hodi bele depozita sira nia kofiansa ba kandidatura feto.
“Tanba oinsa mós, ne’e eleisaun ne’ebé komunidade mak sei hili, tanba ne’e, antes ema atu hili kandidatura, tenki iha ona fiar no koñesementu ida ba ninia kandidatu, entaun ida ne’e mak hanesan prosesu ida,” dehan Diretór iha Salaun Leadirship City 8 Manleuana, Kuarta (13/09).
Diretór dehan, atividade ida mak identifika feto potensial no viabiliza fali.
Vialibiliza fali tanba kandidatura sira ne’ebé hili ona, liu-husi asosiasaun sira tenki halo nia profile no apoiu sira nia programa proridade hodi publika iha nivel lokal no municipal.
Atu nune’e, povu bele hatene kandidatu sira, ema bele iha koñesementu kona ba sira, iha momentum hanesan, fó mós korajem ba sira.
“Dadaun ne’e iha movimentu balun la’o rasik ona, hanesan iha Suku Bemori, Bairo-Pite, Lahane Oriental sira iha motivasaun, organiza rasik ekipa, prepara sira nia profile hodi Publika, talvez husi asosiasaun feto ita apoiu tan sira,” dehan DJ.
Diretór akresenta, la’ós iha formasaun deit maibé feto tenki enkoraza an katak hakarak duni atu kandidata an, sira tenki iha programa bainhira eleitu, sira atu halo saida? tan ne’e, bainhira kampaña tenki atrai ema no sira tenki sensibiliza komunidade sira liu husi media komunikasaun, públikasaun, liu husi mós deziminasaun informasaun iha Munisipiu sira.
Atu nune’e, komunidade feto no mane bele depozita sira nia fiar ba kandidatura feto sira.
Enkuantu iha Munisipiu Dili, Diretór Jeral dehan, asosiasaun feto munisipiu Dili sira identifika ona feto potensial hamutuk 11 mak atu kandidata ba iha eleisaun suku.
Nia dehan, SEI iha akordu ida ho Asosiasaun feto iha Munisipiu Dili, maibé sira mós iha kreatividade hodi hetan apoiu husi parseisu sira ba sira nia programa.
Sira mós iha misaun ida katak, hasa’e tan númeru feto xefe suku sira nian iha Kapital Dili.
“Agora dadauk iha xefe suku nain tolu mak feto, agora husi tolu ne’e, iha trajetu balun ne’ebé atu hasa’e tan no espera sei aumenta diak liu tan,” katak DJ.
Tan ne’e, SEI husu ba komunidade sira karik iha familia ka movimentu iha nivel suku mak iha feto, iha interese no iha kapasidade lideransa atu bele promove sira ba lideransa suku, bele apoiu sira intermus liu husi moral no mós bele apoia pratika no kontribui ideia hodi forma sira nia programa prioridade.
