Diretór Jeral-SEI Armando da Costa hatete, grupo benifisiariu husi fundu rotativu 400 mak dadaun ne'e eziste hela no iha ona nia progresu ne'ebé diak.
Nia dehan, grupo sira ne'e iha ona progresu ne'ebé di'ak, ne'ebé sira halo negosiu hanesan faan modo (hortikultura), keos, alfaiate, haki'ak animal no mós iha simpan pinjam, ne'ebé kuaze iha teritoriu laran tomak.
“Husi grupo sira ne’e maioria nia progresu diak hotu, liliu iha grupo simpan pinjam ne’e moris diak hotu tanba sira nia negosiu ne’e la hare ba tempu,” dehan DJ iha Salaun Leadirship City 8 Manleuana, Kuarta (13/09).
Diretór hatete, husi grupo ne'e, prezisa apoiu makaas tan atu nune’e bele movimentu ba oin tan. Ezemplu henesan grupo nee’bé loke keos presiza apoiu fila-fali tan atu nune’e bele sai loja ida ka loke tan negosiu sira seluk ba oin.
“Se negosiu loke keos karik apoiu fila-fali hodi sai hanesan loja ida no loke tan negosiu seluk, maibé iha grupo balun ne’ebé iha razaun barak, sira eziste hela maibe atu ba oin labele, ne’ebé presiza apoiu tan,” dehan DJ.
Diretór afirma, Grupo rotativu sira ne’ebé negosiu la la’o ba oin tanba tuir kriteriu SEI nia kada grupu iha minimál ema nain lima (5), entaun iha grupo ne’e iha diferensia hanoin no ideas entaun ikus sira tenki fahe malu.
Aleinde, razaun seluk mak, grupu balun hetan fundus iha periodu Kovid-19 nian entaun ho situasaun hirak ne’e negosiu lakonsege jere ho di'ak ikus labele eziste.
Enkuantu, grupo fundu rotativu ne'ebé sei apoiu kada grupo negosiu maksimál ho montante rihun rua ($2.000) no minimál rihun ida ($1.000) nee ba negosiu kategoria familia vulneravél.
