Sekretáriu Estadu Igualidade, Elvina Sousa Carvalho hatete, objetivu husi diálogu ida-ne'e hodi sensibiliza informasaun ba komunidade sira kona-ba hapara violénsia kontra feto no labarik feto sira tuir Instituisaun sira nia servisu.

“Objetivu husi diálogu ne'e, mak hodi sensibiliza informasaun sira ba komunidade sira kona-ba hapara violénsia kontra feto no labarik feto sira tuir kada instituisaun sira nia servisu, ne’ebé iha no mos hodi  rona preokupasaun sira-ne’ebé mak durante ne'e povu hasoru iha área remotas liu-liu iha suku Builale,” Dehan nia liu husi komunikadu Impresa ne'ebé mak Jornál INDEPENDENTE asesu husi Mídia SEI, Kinta (28/11).

Nia dehan, SEI hanesan instituisaun estadu ne'ebé tau matan ba iha asuntu Igualdade no Inkluzaun ho nia papél no responsabilidade mak atu koordena, halo halo advokasia ba iha abordajen integrada jéneru iha polítika, Lei, programa no orsamentu estadu  prevensaun violénsia bazeia ba jéneru, hakbiit ekonómika feto no haforsa partisipasaun feto iha vida polítika no nivél foti desizaun.

"Tan ne’e ho papél ne’ebé mak IX Governu Konstitusionál,  liu-liu Sekretária Estadu ba Igualdade (SEI), servisu hamutuk ho parseiru dezenvolvimentu sira  husi nasionál, intenasional, Sosiedade Sivil no liña ministériu sira hodi ajuda Sekretária Estadu ba Igualdade bele hodi bele halo advokasia ba servisu ne’ebé mak iha,  Tanba servisu sira ne’ebé SEI halo bazeia ba problema ne’ebé mak sosiedade sira hasoru iha baze,” Nia informa.

Maibé, kona ba prekupasaun komunidade nia kona ba violénsia sira ne’ebé mak komete husi mane sira hasoru feto no labarik feto sira iha Timor-Leste, tanba  Timor Leste Sosiedade Patriakal ne’ebé mak forti tebes hodi fo liu vantajien ba mane sira aas tebes, ikus mai kontribui makas ba violénsia hasoru feto no labarik feto sira.

“Ita nia kultura ne’e tau mane aas los, depois feto nia servisu atu servi mane sira, servi oan mane sira no ida-ne’e mak akontese i kultura ne’e metin no kultura ne’e mos kontribui ba violénsia,tia sira, ita bo'ot sira nia la'en baku, tolok, no kultura dehan hau fo folin, ne’e mak hau nia karau, ne’e mak hau nia sasán, hau iha direitu tomak atu baku nia no hanorin nian, ne’e laos hanorin, maibé viola ona ema nia direitu,” Nia relata.

Nia haktuir, violénsia oin-oin ne’ebé komete husi mane no feto laiha dalan atu bele tolera, tanba violénsia nu’udar krime ida ne’ebé kontra direitu seidauk ida-idak nia moris tantu feto no mane.

“Tan ne'e SEI kontinua servisu hamutuk ho Parseiru save sira hodi halo, sosializasaun ba komunidade sira oinsá mak bele hamenus violénsia jeneru iha Timor-Leste,” Nia konklui.

Iha fatin hanesan, Reprezentante Prezidente Grupu Mulheres Parlamentáres Timor-Leste (GMPTL), Maria Angelina Lopes Sarmento informa,  bainhira mane ida halo bauku nia fen, ida ne’e violensia hasoru feto.

 “Violénsia Kultural, tanba sasán sira ne’ebe família rua aseita malu hodi, hakesi no hametin kultura rua Fetosan no Umane, Violénsia ekonomia mak ha'u deit mak ba servisu, o laba servisu, o la ba buka osan maske nia fen iha potensiál abilidade, iha edukasaun ne’ebe diak, maibe mane mak la fo oportunidade ba nia servisu,” Nia hatete.

Nia dehan, tanba ne'e husu atu komunidade sira tantu feto no mane presiza konsesu hamutuk hodi labele hamosu Violénsia iha uma laran hasoru feto no labarik feto sira.

Nune’e, Provedor Direitu Umano no Justisa (PDHJ) Virgílio da Silva Guterres "Lamukan"  reforsa,  Violénsia Kontra feto no Labarik feto ne’ebé oras ne’e sai problema iha sosiedade Timor-Leste, la merese ona akontese iha Timor-Leste, nu'udar nasaun direitu no demokrátivu.

“Iha istória sira-ne’ebe sai atan, sira ne’e mak dala-ruma dehan nia liurai feto ka liurai mane baku no simu deit, ida ne’e tempu liu tiha ona, agora ita iha demokrasia, ita nia rai demokratiku, iha kontituisaun rekuinese igualdade ema hotu hotu ninian, ita nia estadu mos ratifika konvesaun lubuk ida ne’ebé mak hateten katak ema hotu-hotu no ema ida-idak moris mai ne’e livre ho Direitu Umanu hanesan, tan ne’e labele aseita kualker Violénsia” Kata "Lamukan".

Nia dehan, iha Kultura mós la hakerek kona ba Violénsia hasoru feto no labarik feto, liu-liu liga ba hafolin feto tuir kultura tanba ema  moris la'os mai husi violénsia, maibé moris mai husi domin.

"Tanba ne’e husu ba populasaun sira atu labele aseita kualker violénsia oioin hasoru Feto no labarik-feto sira iha uma laran no mós sosiedade,” Nia afirma.

Purtantu, iha diálogu ne’ebe organiza husi Sekretária Estadu ba Igualdade marka prezensa mak simu husi Parseiru Dezenvolvimentu Nasionálbno internasional hanesan, UN Women, UNFPA, UNESCO, Australia Aid, UNDP, WHO, HAMNASA, Care Internasional, PLAN Internasional, Asia Fundation, Nabilan, UNDP, Mere Stopes, NGO TOMAK, Reprezentante Embaixador Autralia.

Nune’e  mós, liña ministeriál  sira mak hanesan Ministru Juventude, Desportu, Arte no Kultura, Ministra Edukasaun, Reprezentante Komando  Polisia Nasional Timor-Leste, Komadante PNTL MUnisipiu Viqueque, Ministru Administrasaun Estatal, Ministra Saúde, Ministru Obras Públikas, SEFOPE, Ministru Ensinu Superiór, Siénsia no Kultura, Ministeriu Interior, Ministru Agrikultura Pekuária, Peskas no Floresta, no Reprezentante Prezidenti Autoridade Munisipiu Viqueque inklui partisipa maksimu Husi Komunidade Suku Builale rasik.