Vise Prezidente Sara hato’o kestaun ne’e hodi kondena “represaun no asediu” ne’ebé governu halo ho intensaun atu hamonu nia ho akuzasaun anti-terorismu.

Tuir Sara, governu uza “Playbook” ne’ebé hanesan ho buat ne’ebé mak uza hasoru Teves Jr. liu husi hamonu kazu anti-terorismu hodi kansela ninia pasaporte, provoka Red Notice, konjela ninia rikusoin sira, no hasai mandadu buska ba ninia propriedade.

Defeza husi Arnolfo Teves Jr., José Ximenes hatete, notisia ikus ne'ebé espalla iha media nasionál iha Filipina, Vise Prezidente Sara Duterte abertamente hasai deklarasaun kona-ba persegisaun polítika hasoru Teves.

“Iha pontu rua importante tebes ne'ebé ha’u hakarak atu hatete iha ne'e. Dahuluk, nia (Sara) hatete oinsa persegisaun politika husi Governu atual halo ba nia opozisaun sira ne'ebé sempre halo kritika hasoru Governu atual, depois sira fó sai kazu dahuluk mak halo persegisaun polítika hasoru Arnolfo Teves Jr.”.

“Ba ami-nia kliente agora iha Timor-Leste ne'e, sira akuza nia ho modelu hanesan ema terorista ida, bainhira nia halo viajen ba Estadus Unidus Amérika, depois kazu omesidu ida akontese iha Filipina hasoru Roel Degamo hanesan Govenador hodi akuza ami-nia kliente mak halo no mate.”

“Entaun modelu ida persegisaun ne'e mak akuza nia halo violasaun ba lei anti-tetorismu nian, depois mai kansela nia pasaporte, hasai mandadu Interpol par atu hasai mandadu kapturasaun, halo kanselamentu ba nia bens.”

“Modelu persegisaun ne'ebé politiku ida mak halo akuzasaun hasoru ami-nia kliente dehan halo kirme ida ne'e, maibé ida ne'e la'ós nia mak halo, entaun ida ne'e mak agora persegisaun politika la'o iha Filipina," dehan José ba Jornalista sira iha nia knaar fatin, JSO, Manleuana, foin lalais.

Defeza ne’e hatete, daudauk ne’e governu Filipina lidera husi Marcos Jr., halo tan persegisaun politika hasoru Vise Prezidente Sara Duterte.

Tuir informasaun, José dehan, hahú ona kaptura Xefe Gabinete.

“Antes persegisaun politika akontese hasoru Sara Duterte, ita-boot sira hatene testamuña ida husi Filipina, Salvadór Paenelo, deklara iha Tribunál Rekursu katak estadu Filipina nia modelu politika agora daudaun buka meius oinsa par atu halo persegisaun ba Vise Prezidente Filipina nian,” dehan nia.

Ida ne’e, tuir nia, mak modelu persegisaun husi governu ne’ebé lidera husi Marcos Jr.

Ho nune’e, nia hatutan, konkluzaun importante ne’ebé foti mak Konstituisaun RDTL artigu 35 númeru 2 proibi atu estradita kualker sidadaun ba nia nasaun rasik bainhira nia iha hela persegisaun nia laran.