Selebrasaun loron mundiál EhD ba tinan ida ne’e ho tema mundial mak “Haforsa Lideransa Ema ho Difisiénsia bá Futuru ida ne'ebé Inkluzivu no Sustentável".
Diretór Ezekutivu ADTL, Cesario da Silva hatete, selebrasaun loron mundiál EhD iha tinan 2024, iha mudansa maka’as ba EhD, tanba governu aloka nia rekursu sira liu husi Sentru Solidariedade Sosiál no Inkluzaun iha kada munisipiu.
“Tema ba komemorasaun loron mundial ema ho defisiénsia tinan ida ne'e iha relasaun ho situasaun ne'ebé ema ho defisiénsia ko'alia kona-bá oportunidade, nune’e ita agradese tebes ba governu tanba hahú investe bá EhD, no ida ne'e, hanesan susesu bo’ot ida ba sosiedade sivíl tanba governu aloka ona nia rekursu hodi selebra loron mundiál EhD iha kada munisipiu,”dehan Diretór Ezekutivu iha Salaun City 8 Manleuna, Segunda (02/12).
Diretór Ezekutivu ne’e relembra fali, iha selebrasaun tinan hira liu bá organizasaun sosiedade sivíl hamutuk ho ADTL mak realiza, maibé agora governu hamutuk ho organizasaun sosiedade sivil sira mak realiza.
Tan ne'e, ADTL konsidera hanesan susesu boot ida ba sosiedade sivíl sira nia advokasia durante ne'e.
Ho nune'e iha seminario Nasionál ba selebrasaun loron mundiál EhD, ADTL konvida lideransa EhD sira atu hato'o sira nia preparativa no komitmentu sira kona-bá prosesu dezenvolvimentu nasionál ba EhD iha Timor-Leste.
Iha fatin hanesan, Diretóra Nasionál Solidariedade Sosiál no Inkluzaun (SSI), Judit dos Reis Sarmanto hatete, governu liu husi MSSI iha komitmentu atu servisu bá ema hotu ne'ebé iha hanoin di'ak dezenvolve nasaun ne'e bá oin.
Nia dehan, nasaun Timor-Leste iha fuan boot hodi asegura sidadaun hotu atu hetan ka goja ninia direitu.
Tan ne’e, orgullu bá nasaun TL tanba bele fó oportunidade hodi asegura ema hotu nia direitu.
"Iha selebrasaun tinan ida ne'e MSSI fó fiar ba Sentru Solidariedade Sosiál iha munisipiu hotu-hotu iha Timor-Leste inkliu RAEOA no Atauro atu bele servisu hamutuk ho autoridade munisipal ho Institutuisaun Solidariedade Sosiál iha kada munisipiu no parseiru dezenvolvimentu sira ne'ebé apoiu iha munisipiu Dili hodi bele organiza selebrasaun ne'e ," dehan Diretora ISS Dili.
Enkuantu, selebrasaun loron mundiál EhD iha Munisípiu Dili nian governu aloka orsamentu ho montante dolar amerikanu rihun $10, ne'ebé finansia bá atividade sira hanesan, selebrasaun misa ba inkluzaun defisiénsia, marsa, konsertu, diskursu no seluk tan.
