Tanba ne’e, Ministra Saúde Odete Maria Freitas Belo, hamutuk ho Vise-Ministru Saúde Bonifácio Mau Coli dos Reis, kinta ohin (1/4) simu ona ekipamentu Walk-in-Cold Room and Freezer Room husi reprezentante Unicef iha Timor-Leste, Bilal Aurang Zen Durrani, iha salaun enkontru SAMES, Kampung Alor, Dili.
Ekipamentu ne’ebé ohin Ministériu Saúde simu ne’e atu rai vasina Covid-19 ne’ebé sei to’o iha Dili, iha loon segunda 5 abril 2021.
“Importante tebe-tebes bainhira ita ko’alia kona-ba Cool Room ne’e ita tenki halo handover ida-ne’e liga tebtebes ho vasina ita ko’alia kona-ba supply chance item malirin nian ita la ko’alia buat seluk ita ko’alia kona-ba jeleira sira maibé ha’u hakarak atu subliña no hato’o fila-fali iha ne’e katak ita-nia preparasaun ne’e la’ós foin maibé ita liuhusi dalan ida ne’ebé mak naruk ita prepara ita-nia planu vasina ita senti katak planu vasina ne’e laforte no ita lori ba Konsellu Ministru atu hetan koñesimentu,”dehan Ministra iha nia deskursu.
Ministra ne’e informa katak, karta ne’ebé nia simu vasina ne’e sei to’o iha fulan-Maiu maibé realidade vasina sei to’o iha tempu besik tuir duni Road Map no tuir planu ne’eb’e trasa ona.
Partisípa iha serimonia ne’e mak reprezentante husi Organizasaun Mundiál Saúde, reprezentante husi Embaixadór Australia, Nova-Zelandia, Portugal, Japaun, Diretór Jerál ho Diretór Ezekutivu husi Ministériu Saúde no seluk tan.
Molok ne’e, iha Parlamentu Nasionál, Primeiru Ministru Taur Matan Ruak, afirma, se buat hotu la’o di’ak, metade husi vasina AstraZeneca 20% ne’ebé Timor-Leste hetan asesu liuhosi sistema COVAX sei to’o iha Timor-Leste fulan abril nia laran.
“Ha’u hakarak klarifika katak daudaun ne’e ita adere hela ba sistema COVAX i ita iha asesu ba vasina AstraZeneca, iha demora lubuk ida, mas buat hotu la’o di’ak pelumenus fulan oin ita simu uluk balun hosi 20% ne’ebé COVAX fó ba Timor-Leste, aleinde ida ne’e ita mos prepara an ba 80% no mos kontaktu maka’as para hetan biban para hetan vasina ba ita nia populasaun tomak”, afirma Xefe Governu hodi hatán ba preokupasaun deputadu sira-nian kona-ba prosesu vasinasaun nian, iha debate kona-ba Estensaun Estadu Emerjensia ba dala 12º, kuarta (31/3), iha Parlamentu Nasionál.
Jornalista: Saturnina da Costa
Editor: Jose Sarito Amaral
