"Ohin deteta kazu positivu 2 iha Munisipiu Ermera. Kazu positivu 2 ne’e halo viajen husi Dili ba Letefoho, iha loron 26 fulan Marsu,"dehan nia liu husi video konferensia iha CCD, (01/04).

Nia hatutan, kazu positivu nain 2 ne’e iha Dili, sira hela iha aldeia Golgota, Suku Comoro. Nune’e ekipa konjunta saúde sei buka-tuir hela kontaktu-besik sira hotu.

Ho nune’e dadus jeral ba loron ohin iha kazu foun na’in 39, kazu rekuperadu nain 3 no kazu ativu ne’ebe agora dadauk iha sala izolamentu hamutuk nain 451.

Husi total kazu foun ohin ne’e iha mane na’in 20 no feto na’in 19 Sira ne’ebe iha sintomás hamutuk nain 4 no ida ne’ebe laiha sintomas hamutuk na'in 35.

Molok ne’e kazu positivu da'et ona iha munisipiu Dili, Covalima, Baucau, Vikeke, Lautem no RAEOA. Enkuantu ohin loron 1 fulan abril tinan 2021, kazu ida ne’e hahu da'et mos ona iha munisipiu Ermera.

Nune’e SIJK nafatin apelu ba komunidade iha fatin ne’ebé maluk sira rekuperadu sira hela bá, favor labele tauk, labela halo diskriminsaun ba sira, tamba sira ne’ebé sai husi fatin izolamentu, ekipa saúde sira sertifika ona katak sira la iha ona risku atu hada’et-tutan virus ba ema seluk.

Apela ba populasaun Timor-Leste tomak, liu-liu iha Munisipiu Dili, Baucau ho Viqueque atu nafatin hakmatek, lalika sé tilun ba lia-anin ka rumores, pratíka nafatin medida sira ne’ebé ita hotu hatene ona, uza mascara, fase liman beibeik ho sabaun ka dezinfetante ruma, evita kose liman ba matan, inus ho ibun, bainhira kumprimenta malu, lapresiza ka’er liman, bensa-liman, rei-malu ka haku’ak malu, evita halibur malu barak, no hamriik ka tur dook husi ema seluk, mínimu metru ida ho balun.

Tanba ho transmisaun lokal hahú makaas ona, Presidente dekreta tan Estadu Emerjensia ba dala-12. Entretantu, kinta ohin (1/4), Governu mós aprova ona medidas prevensaun surtu Covid-19, ne’ebé mantein ho regra anterior.

Jornalista: Saturnina da Costa

Editor: Jose Sarito Amaral