Maski nunee, Polisia Nasional Timor-Leste (PNTL) serka metin iha pontu entrada tolu ne’e, hodi bandu komunidade sira atu sai husi serka sanitária Dili bainhira laiha autorizasaun husi Sentru Integradu Jestaun Krize (SIJK).
Tuir observasaun online INDEPENDENTE, sesta (2/4) hatudu katak, komunidade kuaze 200 iha pontu entrada Tasitolu, 250 iha pontu entrada Metinaro, no 100 iha pontu entrada Manleu Beduku, ho idak-idak nia transporte hakarak fila ba Munisipiu.
Komunidade sira balun hakilar “Corona ne’e bosok, husik ami fila ba ida-idaik nia knua, tanba hahan laiha ona, ami atu han saida iha Dili”.
Maski komunidade sira hakilar, maibé polisia kontinua la fó autorizasaun atu komunidade hirak ne’e halo viazen ba Munisipiu.
Haree ba numeru komunidade ne’ebe ejize hakarak fila aumenta, autoridade seguransa kompostu husi forsa rezerva no Batalliaun Orden Publiku (BOP) serka metin iha area refere no la autoriza sira sai husi Kapital Dili.
Komunidade balun bele utrapasa tanba iha gia de marsa husi Sentru Integradu Jestaun Krize (SIJK) no halo ona teste swab.
Enkuantu, sira seluk ne’ebé laiha gia de marsa no laiha rezultadu teste swab polisia la autoriza atu bele halo viazen ba Munisipiu.
Tuir komunidade ida husi Postu Administrativu Bazartete, Munisipiu Likisa, Bernardino dos Santos hatete, iha serka sanitária ba dala-3 ne’e senti susar ona ba aihan.
Nia dehan, kondisaun moris iha Dili sei senti di’ak iha serka sanitária dahuluk no segundu. Senti susar ona aihan hafoin Governu extenda tan serka sanitária ba dala-3, tanba aihan ne’ebé prepara ne’e hodi hein segundu serka sanitária remata mak foin bele ba Munisipiu hodi foti aihan.
Maibé realidade la akontese, tanba ne’e nia deside tenki fila ba duni ba Munisipiu. Kona-ba Governu aprova ona medidas apoiu ba komunidade ba estudante sira, nia responde katak, apoiu Governu tarde, hein bainhira mak atu apoia.
Molok ne’e Ministru Prezidensia Konsellu Ministru, Fidelis Leite Magalhãens hatete katak, governu prepara ona orsamentu miliaun $250 ba sosio-ekonomiku ne’ebé tama ona iha orsamentu retifikativu no hein semana oin debate iha Parlamentu Nasional.
Jornalista: Saturnina da Costa
Editor: Jose Sarito Amaral
