Deklarasaun Sekretariu Estadu ne’e relasiona ho preokupasaun husi Konfederasaun Sindikatu Timor-Leste (KSTL) ba lei salariu minimu ne’ebé to’o ohin seidauk hetan aprovasaun.
"Ha'u kompremetidu ba ita-boot (jornalista) sira iha publiku katak mandatu ha'u nian ne'e rezolve kona-ba salariu minimu, maibé tempu ne'e ha'u hatete tinan agora no tinan oin," dehan nia iha salaun Timor Lodge, Kuarta (15/01).
Sekretariu Estadu ne’e dehan, lei salariu minimu ne’e aprezenta ona ba Konsellu Ministru (KM) no KM haruka fila fali hodi hadia pontu balun.
"Ne'ebé pontu balun ita sei hadia no Sekretariu Estadu Formasaun Profesional no Empregu sei konsulta parte relavante sira hodi kontrola presu sasan iha merkadu. Karik hasa'e salariu minimu ho urijente no ba merkadu sira hasa'e sasan nia presu tuir idaidak nia hakarak sei prejudika povu ne'ebé atu ba sosa,” dehan nia.
Molok ne’e, Prezidente Konfederasaun Sindikatu Timor-Leste (KSTL), Almeiro Vila-Nova hatete, KSTL haree katak proposta lei salariu minimu ne’e sei relevante tan ne’e ezije nafatin ba SEFOPE atu lori fila fali proposta lei salariu minimu ba Konsellu Ministru (KM).
KM, rekomenda atu halo peskiza foun hodi deside fali salariu minimu. Maibé ba KSTL, di’ak liu Governu avansa ho proposta ne’ebé iha tiha ona ho salariu minimu $150.
"Ita-nia kestaun ne’e mak ita hakarak avansa lai ho proposta ne'ebé mak iha ona ne’e, depois mak Konsellu Nasionál Trabalho ne’e halo fali peskiza foun hodi determina salariu minimu ne'ebé mak kondis duni ho situasaun moris trabalhador ho ninia familia," dehan Almeiro via WhatsApp, Tersa (14/01).
Iha tinan ne’e, KSTL planu atu halo advokasia ne'ebé forte no kampaña ne’ebé forte liu tan hofi brlr atrai opinaun publiku ba kestaun polemika salariu minimu. "Ita mós sei aproxima ba iha Governu, liu-liu Primeiru Ministru, atu konsidera hikas fila fila proposta dekretu lei ne'ebé antes ne’e hato'o ona iha tinan kotuk.
Ne'ebé KSTL sei tau prioridade hodi aprosima Governu hodi tau ajenda fila fali kona-bá Salariu Minimu nian iha reunian Konsellu Ministru," katak nia.
Lei salariu minimu, nia dehna, tinan 12 ona seidauk halo revizaun, tanba ne’e to'o ohin loron mantein ho salariu minimu $115.
"Tinan 12 ne'e tinan ida ne'ebé ke naruk tebes, ita la konsege reve ita-nia salariu minimu ne'ebé mak real ho kondisaun moris ohin loron nian, ne'ebé mak persiza halo mudansa kona-ba problema inflasaun tinan-tinan kontinua sa'e ba bebeik fó implikasaun ba Trabalhador ho ninia familia."
"Ema servisu maka'as depois la balansu ho rendimentu ne'ebé mak trabalhador ne’e hetan. Ida ne'e ita kestiona kona-ba justisa no kestiona salariu ne'ebé mak justu, tanba ne'e mak ita persiza iha balansu.”
“Se salariu ne’e sa'e, ida ne'e mós sei motiva trabalhador atu bele hasa'e ninia produtividade servisu no badinas liu, atu kontribui ba ekonomia kompaña ninian. Ne'ebé ha'u hanoin laiha razaun fundamentu atu Governu kontinua suspende revizaun ba salariu minimu ne’e," nia dehan.
