Tuir karta sirkular ne’ebé asina husi Prezidente Autoridade Munisipiu Dili, Gregorio da Cunha Saldanha ‘Mouris’, ne’ebé INDEPENDENTE asesu, Kuarta (15/01), hatete, karta sirkular ho númeru: 01/PAM-Dili/MAE/I/2025 hasai regra baziku ba prosesu haloot mate-isin iha semiteriu sira iha munisipiu Dili.
Iha karta ne’e hatete, regra ne’e hasai tanba haree ba semitériu públiku sira iha Dili laran ne’ebé laiha ona fatin atu haloot mate-isin no espasu ka rai iha Dili laran ne’ebé limitadu tebes atu harii tan semiteriu foun.
Aleinde ne’e, haree mós ba importánsia hodi halo prevensaun ba komunidade sira atu haloot mate-isin iha uma huun no kintal laran, atu labele fó impaktu ba meiu-ambiente no saúde komunidade nian no importante atu asegura katak mate-isin ema nian labele hakoi arbiru iha fatin sira ne’ebé la'ós semitériu.
“Hatetu ba alargamentu semitériu Bekusse ne'ebé remata ona, no presiza halo ordenamentu ba espasu iha semitériu públiku sira iha Munisipiu Dili hodi dignifika ema ne’ebé mate ona, nune'e Prezidente Autoridade Munisípal Dili haktuir ba kompeténsia ne'ebé atribui husi artigu 6 no artigu 25 nu. 5 alínea ‘e’ husi Dekretu lei nú. 84/2023, 23 Novembru, altera husi Dekretu Lei nú. 3/2016, 16 Marsu, hasai sirkular ida ba populasaun sira iha Munisiplu Dili kona-ba regras báziku sira iha prosesu haloot mate-isin iha semitériu públiku sira iha Munisipiu Dill,” hakerek iha karta ne’e.
Regra haloot mate-isin ne’ebé AMD fó sai mak hanesan tuir mai ne’e:
Preparasaun atu hakoi mate
Mate isin tenke koloka iha kaisaun ne'ebé halo ho ai; Rai-kuak sei kee tuir medida ne'ebé determina iha númeru 4; Rai-kuak sei lafui sumente ka hada bloku.
Oráriu hakoi mate
Servisu administrasaun nian sei hahú loke husi tuku 08:00 to'o tuku 05:30 lokraik; Semitériu públiku sira sei hahú loke hodi hakoi mate hahú husi tuku 08:00 dader to'o tuku 05:30 lokraik; Vizita rate sira hahú husi tuku 08:00 dader to'o tuku 08:00 kalan.
Prosedimentu haloot ka hakoi mate-isin
Familia ka ema ne'ebé assume responsabilidade ba ema ne’ebé mate ona tenke informa kedan ba Diresaun Servisu Munisípal Obras Públika no Transporte, Autoridade Munisipal Dili (DSMOPT-AMD); DSMOPT-AMD sei organiza oráriu haloot mate-isin no koordena ho kobeiru sira hafoin sei informa fali ba familia matebian minimu iha oras neen (6) nia laran; Prosesu hakoi mate sei responsabiliza husi koordenador semitériu Munisipál hamutuk ho ekipa kobeiru; Raikuak sei ke'e husi kobeiru Munisipal.
Medida rai kuak
Ba ema boot naruk metru rua, luan sentimu 0,80 no klean metru 1,20; Ba labarik naruk metru ida, luan sentimu 0,60, no klean metru ida.
Rate ka kampa
Rai kuak okos sei la fui no nahe simente no la hada bloku
Modelu no medida rate ka kampa
Modelu kampa sei halo tuir dezeñu ne'ebé prepara ona husi DSMOPT ho nia medida: Ba ema boot altura sentimu 0,80 (inkui ona plaka naran no fotografia), Luan metru ida, no naruk metru 2.20; Ba Labarik altura sentimu 0.80, luan sentimu 0.80 no naruk metru 1.20.
Distansia entre rate
Distánsia entre rate ida ba rate seluk sentimu 0.40
Organizasaun no funsionamentu servisu
Semiériu públiku sira iha Munisípiu Dili sei organiza no jere husi DSMOPT-AMD; Semiériu públiku sira sei hahú loke hodi hakoi mate husi tuku 08:00 dader to'o tuku 05:30 loraik; Servisu administrasaun nian sei hahú loke husi tuku 08:00 to'o tuku 05:30 lokraik; Vizita rate sira hahú husi tuku 08:00 dader to'o tuku 08:00 kalan.
Proibisaun
Labele fui sumente no hada bloku iha raikuak; Labele sunu lilin besik aifunan masa ka aifunan maran iha rate leten; Labele hasai liafuan a'at ou pratika aktus ofensivus iha semitériu laran; Labele lori no husik animál iha semitériu laran; Labele tau aifunan no sunu lilin iha dalan no espasu entre kampa; Labele kuda aifunan ka ai-oan iha rate ninin; Labele halo manifestasaun iha semitériu laran; Labele husik labarik sira lao mesak iha semitériu laran; Labele la'o iha rate leten; Labele halo fo'er rate sira no aredor semitériu nian; Labele halo barullu iha semitériu laran; Labele hemu tua iha semitériu laran.
