Vise Ministru Obra Publika asuntu Infraestrutura, Julio do Carmo hatete, normalmente governu bainhira halo buat ida tenke iha planu, maibé planu ne’e depois mak hatene.

‘‘Ha’u labele hatete katak obras públiku halo tiha ona uma andar iha ne’ebá depois ba hasai komunidade sira. Ita rejista lai mak bazeia ba lista ne’e mak ita selu, la’ós  mai fó de’it, ne’e labele, ne’ebé ha’u labele dehan katak aban selu ona, maibé automatikamente fulan ida ne’e ou fulan oin, bainhira levantamentu dokumentu ne’e kompleta ona mak foin ita bele halo pagamentu indemnizasaun,dehan Julio ba jornalista sira hafoin reniaun Konsellu Ministru, iha palasiu Governu, Kuarta, (15/01).

Ba indemnizasaun, nia dehan, la selu hanesan maibé depende ba medida husi uma ne’ebé sobu.

“Komunidade ne’ebé afeta ita sei lori ba sira-nia moris fatin. Sira ne’ebé mai husi Ermera ita lori ba, sira ne’ebé mai husi Suai ita lori ba Suai, no munispiu ida ne’ebé de’it Governu sei lori to’o sira-nia fatin,’’ dehan Vise Ministru ne’e.

Iha biban ne’e, Vise Ministru esplika kona-ba razaun governu hasai komunidade sira iha mota-ninin, tanba risku maka’as.

“Komunidade sira ne’ebé hela iha mota-ninin no foho lolon risku maka’as, tempu udan mota sobu sira-nia uma Governu mak sala, kuandu rai monu mós Governu mak sala.”

Tanba ne’e, nia dehan, governu deside hodi hasai komunidade sira iha fatin risku nune’e povu labele sai vitima.

‘‘Ne’ebé ha’u labele hatete katak atu halo uma andar ba sira, maibé Governu  lori fali ba sira-nia fatin,’’ nia dehan

Iha fatin hanesan, Vise Ministru Asuntu Parlamentár, Adérito Hugo da Costa hatete, desde uluk kedan mota-ninin ne’e proibidu atu halo konstrusaun hodi hela.

“Fatin ne’ebé iha mota-ninin desde uluk kedas fatin ne’e ema bolu dehan zona verde, ne’e proibidu atu halo konstrusaun. Se halo konstrusaun komunidade labele hela, iha de’it mak zona verde ka jardin atu kuda aihoris hodi proteze mota ne’e rasik atu labele afeta ba komunidade seluk nia uma,” dehan nia.

Iha prinsipiu, fatin ne’ebé sofre eviksaun ne’e la’ós fatin foun. Governu sira uluk mós alerta hela ba komunidade sira halo uma ne’e la’ós permanente maibé provizoriu.

Kona-ba indimnizasaun, nia dehan, sistema ba orsamentu 2025 foin loke iha semana kotuk, nune’e Ministériu ne’ebé atu fó indemnizasaun sei halo prosesamentu ba Ministériu Finansas.