Portavoz Profesor kontratadu 2023, Agustinho Pinto hatete, agradese ba ME tanba fó nafatin oportunidade ba sira atu halo dialogu tuir orientasaun Primeiru Ministru nian katak tenki ko'alia ba malu hodi rezolve problema ne'e.

"Ohin Ministériu Edukasaun propoin proposta ida ba ami sei loke teste espesial ba profesor kontratadu 2023, maibe iha ami nia hanoin probelma ne’e la’ós iha partisipa teste ne'e, maibé legalidade husi teste ne’e rasik tanba nee mak husu katak buat bele halo maibé labele ses husi lei estatutu kareira dosente no Komisaun Fusaun Públika, se lei rua nee mak fó dalan ona ami sei tuir,"dehan Porta voz iha Vila-Verde, Kinta (16/01).

Portavoz ne’e hatutan, sira lakohi sai vitima iha futuru, tanba durante ne’e sira tuir hela dalan legál maibé problema kontinua akontese, tanba ne'e parte rua nafatin halo dialogo kontinuasau iha tempu tuir mai hodi buka solusaun ba problema refere.

Nia dehan, sira la'os rejeita opsaun ne'ebé ME fó maibé tenki iha akordu ida atu nune'e professor kontratadu sira ne'ebé tuir teste laliu labele lakon direitu.

“Tanba teste ne'e iha lakon ho manan se hakarak ami partisipa iha teste ne'e ami la iha problema, maibé ita hakarak saida mak iha dekretu lei ne'e tanba vinkula hela ema nia direitu ne'e, tan de'it diferensia polítika halakon ema nia direitu," dehan Portavoz.

Iha fatin hanesan, Sekretáriu Estadu Ensinu Sekundariu Jerál no Tékniku Vokasionál, Domingos Lemos Lopes hatete, dever ME mak dadaun ne'e venkula hela problema professor kontratadu 2003 nian hodi buka solusaun ne'ebé di'ak tanba atu sai profesór ida la fasil.

"Klaru katak durante tempu naruk ita boot sira kontribui ona tempu ba tomak ba iha Ministériu Edukasaun liuliu iha eskola sira, tanba ne'e Ministériu iha ona hanoin bazeia dekretu lei sira ne'ebé iha," dehan Sekretáriu Estadu.

Governante ne’e dehan, tan ne'e ME iha ona opsaun ida katak sei loke teste espesial ba PC 2023 de'it la inkliu públiku sira.