Saudozu nia restu mortal molok lori ba haloot iha jardim dos herois Metinaro, presta omenajem ikus husi Prezidente Konsellu Kombatente Libertasaun Nasional, Vidal de Jesus “Riak Leman” ho nia Vise no mós membru CCLN.

Hafoin remata iha CCLN, kontinua lori ba sede Komite Sentral FRETILIN hodi presta omenajem ikus husi Prezidente Partidu FRETILIN Francisco Guterres Lu-Olo, Sekretariu Jeral Mari Alkatiri no mós membru CCF sira hotu.

Prezidente CCLN, Vidal de Jesus “Riak Leman” hatete, Timor-Leste lakon nia komandante di'ak ida, iha tempu luta ba ukun rasik aan, liuliu ba familia emlutada sira.

"Ba familia emlutada, atu dehan de'it katak saudozu Olo Cassa nudar Komandante Setór Ponta Leste ninia iha tempu uluk liu, ne'ebé ita lakon ita nia komandante di'ak ida, no ba ita hotu, lakon ema di'ak ida liuliu ba familia emlutada sira," dehan Riak Leman, iha CCLN Komoro, (17/01).

Nia dehan, ema hotu hatene katak, herois balun mate to’o ohin loron seidauk hetan sira nia ruin, Inimigu lori balun bá soe iha tasi laran no balun soe lakon de'it, tan ne'e ohin loron balun hetan ona nia ruin no balun la hetan.

Maibé tanba konsekuensi funu nia rezultadu mak ohin loron Timor-Leste hetan ukun rasik-aan.

"Ita terus, ita mate, lakon familia didiak, tanba funu, tanba ne’e mak ba familia emlutada sira imi lakon ema di'ak ida, hanesan mos ita hotu komandante diak ida, maibé nia istoria no luta ne'ebé nia halo iha funu sei la lakon, iha ita nia hotu nia memoria," katak Riak Leman.

Iha sorin seluk, Prezidente Partidu FRETILIN, Francisco Guterres “Lu-Olo”, hatete, saudozu Olo Cassa nu'udar komandante ponta leste nian, ne’ebé luta tempu naruk to’o fó nia-aan ba mate.

Prezidente FRETILIN hatutan, saudozu Olo Cassa durante funu la’os  hanesan militar de’it, maibé saudozu mós nudar militante FRETILIN nian hodi kaer kilat iha liman, nu’udar liman kroat FRETILIN nian.

Lider Rezistensia ne’e kompromete, hanesan prezidente partidu FRETILIN hamutuk ho Sekretariu Jeral Partidu FRETILIN, kontinua hahi no hanai hodi halo komprimisiu ne’ebé uluk saudozu sira halo to’o lakon sira vida.

"Tanba ne'e maluk oan kiak sira, maun alin sira, ha'u lori Komité Sentral FRETILIN nia naran no lideransa tomak presta omenajem rekoñesimentu boot tebe-tebes ba ita nia komandante Lino da Costa "Olo Cassa", obrigado Linu ba ó nia sakrifisiu tomak," Lu-Olo hato’o.

Iha biban ne’e, reprezentante familia Saudozu, Rozito Monteiro hato’o agradesimentu profunda ba estrutura tomak partidu FRETILIN nian,  ne’ebé  durante ne’e hamutuk ona ho saudozu iha tinan hirak liu ba, bainhira saudozu sei moris.

Enkuantu, Saudozu Lino da Costa “Olo Cassa” lakon vida iha tinan 1980 ho idade 31, iha Postu Administrativu Uatulari Munisipiu Vikeke no momentu ne’ebá saudozu asume knar nu’udar komandante setor ponta leste.

Saudozu nu’udar oan daruak husi maun alin nain 8, saudozu moris iha Suku Ossu de Sima, Postu Administrativu Ossu Munispiu Vikeke.