Primeiru-Ministru Kay Rala Xanana Gusmão fó apresiasaun bá inan aman sira ne’ebé dedika sira nia-aan ho sakrifísiu boot, dezde uluk, bainhira Timor-Leste hakaas-aan atu sai rai independente ida, to’o ohin loron hatudu nafatin sakrifísiu ida-ne’e bá oan sira.
“Agora imi eskola hotu ona, bá servisu karik, la’ós atu manán osan, maibé servisu hanesan misaun ida. Husu atu hanoin nafatin imi-nia kosar, hanoin nafatin imi nia terus. Imi lalika bá haku’ak inan-aman hodi tanis, ne‘e bosok ten. Imi-nia obrigadu di’ak liu bá inan-aman maka bainhira imi servisu ho di’ak no bainhira imi servisu ho laran tomak," dehan PM Xanana Liu husi Komunikadu ne'ebé Online INDEPENDENTE asesu iha Pájina ofisiál GPM, Sesta (17/01/25).
Líder nasionál ne’e apresia tebes ho inan-aman sira nia kontribuisaun hodi oferese ona oan sira bá eskola, sai matenek atu bele kontribui bá rai ida-ne’e. Matenek ne’ebé sira simu iha ne’e no sira prepara-aan atu sai ema ne’ebé kualidade iha sosiedade.
Iha serimónia ne’e mós Primeiru-Ministru asina plaka bá konstrusaun edifísiu professores ne’ebé hetan apoiu hosi IX Governu Konstitusionál liu-hosi Ministériu Ensinu Superiór Siénsia no Kultura.
Iha etapa ida-ne’e Instituto São João de Brito realiza graduasaun bá dala VI ho estudante finalista na’in 122 mai hosi únika Fakuldade maka hanesan, Fakuldade Edukasaun ho nia departamentu haat mak hanesan Departementu Ensinu Língua Inglesa, Edukasaun Relijioza, Ensinu Língua Portuguésa no Ensinu Matemátika.
Institutu São João de Brito estabelesida iha tinan 2016 no konsege ona fó gradua ba Timor-oan hamutuk na’in-314.
ISJB hanesan institutu ida ne’ebé promove kualidade edukasuan liu-hosi formasaun professores, oferese kuiñesimentu profundu, alta kompeténsia atu oferese líder iha edukasaun bá povu timorense hodi serví iha edukasaun iha kualkér fatin ne’ebé ho nesessidade boot.
Tanba ne’e, Institutu kolabora ho Govenu Timorense, ho Igreja Katólika iha ninia formasaun sira, iha ninia funsionamentu no estudante hotu-hotu ne’ebé pertense, iha instrusaun kualidade bazeia bá Paradigma Pedagójiku Inaciano maka kontestu, esperiénsia, reflesaun, asaun no avaliasaun.
Partisipa iha serimónia ne’e maka Ministru Ensinu Superiór Siénsia no kultura (MESSK), José Honório da Costa Pereira Jerónimo, Korpu dosente, família graduadu sira no konvidadu espesiál sira seluk.
Primeiru Ministru mós oeferse ai-funan bá graduadu no korpu dosente sira hanesan símbolu korazen atu servisu karik, tenke serví ho fuan no servisu ho laran.
