Hafoin serimonia entrega sampel hirak ne’e, Komandante Operasaun DIKN Inspetúr Xefe Polísia Mouzinho Correia hateten, iha oportunidade ne’e entrega mós sampel rua seluk maka hanesan insidente tiru iha Matadoru ne’ebe akontese iha loron 01 fulan Janeiru 2025, iha mós kazu ida akontese iha residensia eis PR Lu-Olo nian.

“Objetivu ezaminasaun ida ne’e primeiru maka atu hatene mais ou menus arma tipu saida maka uza hodi tiru, segundu ita mós tenta atu hatene sé maka tiru, maibé prinsipal atu hatene primeiru maka arma saida, hodi ida ne’e ita rekolla pistola lima (5) husi Unidade Espesial Polísia (UEP) nian sai hanesan amostra/referensia hodi halo komparasaun ho sampel ne’ebé ita rekolla ona iha loron hirak liu ba iha residensia eis PR nian no ida fali iha residensia sidadaun sivil ida iha Matadoru”, esplika Komandante Operasaun DIKN, liu husi komunikadu ne’ebé Online INDEPENDENTE asesu, sabado ne’e (18/01/25).

Inspetúr Xefe Polísia ne’e hatutan, prezensa ekipa sira husi Australia, Péritu Balistiku nian iha Timor-Leste hodi apoiu, fasilita PNTL ba exame ida ne’e.

Aliende fasilita PNTL, AFP mós fó treinamentu básiku ba  tékniku forensik sira durante semana ida nia laran.

Iha fatin hanesan Péritu Balistiku husi TFLPD-AFP Matthew Bolton iha ninia intervista, agradese ba Komandu PNTL liu-liu DIKN ne’ebe permite ona AFP hodi mai fó apoiu halo investigasaun ba kazu tiru ne’ebé akontese iha Timor-Leste.

“Ha'u orgullu tebes tanba iha ekipa Forensik ne’ebé kapas, sira ema diak iha ne’e, ha’u gosta tebes atu fó treinamentu ba sira, kona-ba durasaun tempu hodi bele hatene resultadu Ezaminasaun ne’e parese sei lori tempu semana ha’at (4) ami halo komparasaun microscope nian,” tenik Péritu Balistiku husi TFLPD-AFP ne’e.

Matthew Bolton esplika liu tan katak ba futuru TLPDP no AFP sei kontinua apoiu PNTL hodi halo investigasaun ruma ne’ebé maka PNTL presiza.