Diretór Jerál SEFOPE, Carlito do Rosario Cabral hatete, dadaun hahú prosesu manutensaun ba edifísiu SEFOPE, iha área João Paulo II, Tasi-tolu, aldeia 12 de Outubru, Suku Komoro, Postu Adminitrativu Dom Aleixo Munisipiu Dili ne’ebé  Sekretáriu Estadu  Terra Propriedades distribui ona liu husi karta ofisiál.

“Ho razaun atu muda edifísiu SEFOPE iha  Kaikoli ba Tasi-tolu,  atu nune’e Diresaun sira hare'e ema sira-ne'ebé, atu halo Kobransa ilegál ne'e, atu nune'e servisu hamutuk ho Diresaun sira hodi kontrola ba malu,” Dehan Diretór Jerál SEFOPE, Carlito do Rosario Cabral ba Jornalista INDEPENDENTE, iha knaar fatin Kaikoli, Segunda (29/04).

Carlito dehan, tanbá agora sei prosesu buat ruma hodi hetan Kontratu ruma halo manutensaun ba edifisiu foun iha Tasi-tolu, maibé seidauk muda tanbá prepara hodi simu bainaka Amu papa Francisco nia vizita iha Timor-Leste.

“Depois iha fulan Setembru vizita Amu Papa Francisco nia vizita hotu, foin kontinua halo reabilitasaun edifísiu foun SEFOPE hotu foin, muda ba fatin refere,” Nia relata.

Nia afirma, Diresaun hot-hotu tenke ba hotu iha ne'ebá, nune'e bele kontrola servisu ho di’ak, atu bele evita servisu balun ne'ebé, la'ós atu deskonfia, maibé maluk sira-ne’ebé bosok traballador Timor oan sira hodi halo kobransa ilegál.

Entaun Diresaun sira ne'ebe atu muda ba Tasi-tolu hanesan Diresaun Nasional Empregu no Estranjeiru (DNEE), Diresaun Nasional Empregu (DNE) no sira seluk tan ne'ebé tutela iha SEFOPE.

“Maibé, ami sei tau orsamentu oituan hodi halo reabiliasaun edifísiu foun ne'e, prosesu sei la'o hela, ami hetan doadores husi KOICA sira halo levamentu fatin ida ne'e, iha Tasi-tolu hodi atedinmentu ba traballadór Timor-oan sira-ne'ebe atu ba servisu iha rai-li’ur,” Nia informa.

Kona-ba montante orsamentu halo reabilitasaun edifisiu foun iha Tasi-tolu, nia parte, labele fo-sai tanbá segredu no prosesu aprozionamentu nian.