Prezidente Organizasaun Rede Soru Na’in, Luciana Guterres, husu ba Governu atu kontrola Xineza sira-ne'ebé plájia tais Timor-Leste hodi fa’an fila-fali ba sidadaun timor oan ho folin ne'ebé baratu.
Nia dehan, Governu presiza tau atensaun ba Xineza sira-ne’ebé plájia tais ne'e, tanba tais ne'e nu'udar identidade Timor-Leste ni’an, karik Governu la tau atensaun mak sei fó impaktu ba prodúsaun tais iha Timor.
“Xina sira ne'ebé faan tais ne'e fo impaktu mai iha ita nia proúdsaun tais, tanba dala-barak timor oan sira sosa ida-ne'ebé baratu ne'e hodi utiliza do que ida ita halo asli ne'e. Rekomendasaun forte husi Rede soru na'in sira ba Governu mak, atu tau matan ba ita nia tais sira, atu kontrola nasaun seluk ne'ebé kopia ita nia tais halo produsaun depois faan fali iha ita nia rai,” Dehan Prezidente Organizasaun Rede Soru Na'in, Luciana Guterres, iha Salaun INFORDEPE, Segunda (29/04).
Nia haktuir, tanba ne'e Governu seriu hodi kontrola Xineza sira, tanba ne'e identidade timor nian, karik Governu la haree lalais mak sei fó impaktu maka'as ba Soru na'in sira.
Nia fundamenta, sira sei nafatin esforsu, atu labele lakon ho Xina sira ne'ebé faan iha loja ne'e, maibé husu ba governu oinsá atu kria lei ida hodi bele asegura no tau matan ba sira ne'ebé plájia tais Timor nia hodi fa’an iha loja.
Hatan ba kestaun ne'e, Ministru Juventude Desportu Arte no Kultura, Nelyo Isaac Sarmento informa, ba oin sei haree oinsá atu kontrola ema husi rai seluk ne'ebé plájia tais Timor hodi fa’an iha loja.
“Ita seidauk iha lei ne'ebé menpertahankan ida-ne'e, tanba ne'e mak buat sira ne'e sei la'o ne'e, maibé ita labele husik buat ne'e la'o beibeik, bainhira ita integra ona iha edukasaun ita prezerva ona. Ita sei defende ona ida-ne'e, nu'udar ita nia produtu orijinál, laiha kualkér ema ne'ebé mak atu foti ida-ne'e, nia tenke selu, ita iha komisaun ida agora,” Nia informa.
Ministru Nelyo informa, iha dekretu-lei ida ne'ebé elabora hela iha Sekretáriu Estadu Arte no Kultura (SEAK), kona-bá oinsá mak halo rejistrasaun ba ema hot-hotu liu-liu iha Rede tais sira-ne'e, kuandu sira halo tais ho modelu hanesan ne'e se ni’an, entaun nia tenke ba rejista iha ne'ebá katak ida ne'e produtu ida-ne'e nini’an, nune'e ema seluk labele kopy.
Tuir nia, ideia halo tais ne'e nia valór aas liu do que halo metisaun, ne'ebé kuandu atu emita tais ida nia modelu, tenke hanoin katak iha lei-ne'ebé sei dezenvolve ne'e mak sei regula. Maibé lei direitu de autór ne'e iha, bainhira ema ne'ebé imita ne'e la'ós tur-tur naran foti de'it, maibé tenke selu ba ema ida ne'ebé produtu ideias ne’e.
“Tanba ne'e mak ita-boot sira hatene iha ne'e Rede soru tais, sira ne'e mak ideias, menciptakan ideias ideias tais nia kores sira ne'e. Kuandu ida-ne'e la'o ba oin, ita nia lei forte tan kualkér ema ida de'it, ita-boot pengusaha ida, pengusaha texting, hakarak atu halo modelu tais ida ita boot tenke hanoin katak tenke selu royalti ba sira ne'ebé menciptakan motif ne'e, ne'e ita tenke reforsa iha ita nia lei sira ne'ebé iha ita nia rain,” Nia relata.
