Enkuantu, traballadór hirak ne’e sei ba servisu iha área fabrika na'in 19, peskas na’in 50. Husi númeru ne’e iha re-entry na’in 3.
“Ita hotu hatene katak antes ita nia traballadór sira desloka ba iha rai-liur, hanesan ba iha Áustralia, Korea, no Japaun ita sempre realiza serimonia despedida ba ita nia traballador sira, nia objetivu mak parte governu, família no traballador sira atu selebra deklarasaun ruma antes sira desloka bá,”dehan Sekretáriu Estadu Formasaun Profisional no Empregu, Rogerio Araújo Mendonça, iha Salaun Timor Lodge, Komoro, Dili, kuarta (29/05).
Nia hatutan, bainhira traballador sira desloka ba iha nasaun ida, SEFOPE mós fó ona orientasaun, liu-liu regras no prosedimentu ne'ebé eziste iha nasaun ne'ebé mak traballadór sira atu desloka bá, entaun governu mós tenke hato'o mensajen nune'e traballador sira nafatin hatudu komportamentu ne'ebé di'ak.
Iha fatin hanesan, Embaixadór Korea Súl iha Timor-Leste, Shin Man Taek hatete, nia apresia tebes ba traballadór na'in 69 ne'ebé hetan oportunidade hodi ba servisu iha Korea Súl, tanba la’ós ema hotu bele hetan oportunidade hanesan sira ba servisu iha rai-liur.
“Liu husi imi nia esforsu hotu, ikus imi bele hetan oportunidade hodi ba servisu iha rai-liur, tanba ne'e ha'u enkoraja ita boot sira katak imi ba reprezentante nasaun Timor-Leste, la'os individual, ho nune'e imi ba tenke hatudu imi nia komportamentu ne'ebé mak di'ak, ita nia hahalok ne'e importante tebes, ita ba la'os individual maibé reprezentante nasaun Timor-Leste" nia dehan.
Entretantu, Reprezentante traballador Luís De Deus, ne'ebé sei servisu iha área fabrika hateten, nia sente orgullo tebes, tanba nia bele hetan oportunidade hodi ba servisu iha rai-liur.
Nia akresenta, tamba durante nia luta iha teste hetan dezafiu barak, maibé dezafiu sira ne'e lasai sasukat ba nia hodi kontinua kompete tuir teste ikus, nune’e nia mós konsege hetan oportunidade.
"Ha'u sente orgullo no kontetente tebes, tanba bele hetan oportunidade ne'e, hakarak hato'o mós ha'u nia agradese ba Governu liuhusi Sekretáriu Estadu Formasaun Profisional no Empregu (SEFOPE), tanba bele servisu hamutuk ho nasaun seluk hodi fó kampu traballo ba ami joven Timoroan hodi bele halo mudansa mós iha ami nia ekonomia uma laran no ba nasaun" dehan traballador.
iha biban ne’e, traballadór ne’e mós apela ba joven sira seluk atu kontinua esforsu an labele lakon vontade atu aprende, nafatin esforsu an bainhira hasoru dezafiu iha prosesu sira.
Enkuantu, traballadór na'in 69 ne'ebé atu ba servisu iha Korea Súl, sei aranka iha fulan-Juñu, tinan ne’e.
