Enkuantu, traballadór timoroan na’in hitu (7), kompostu husi feto haat (4) mane tolu (3), ne'ebé sai grupo dahuluk husi Timor-Leste ne'ebé atu ba servisu iha Japaun ho durasaun tinan tolu ho modelu hanesan estajiu, liu husi Programa Technical Intern Trainer (TIT) ne'ebé hanesan pilotu.
Husi akordu ne'e mak asina ona ho governu anterior ne'ebé lidera husi Eis Primeiru Ministru Taur Matan Ruak iha tinan 2022.
Sekretáriu Estadu Formasaun Profisoinál no Emprego, Rogério Aroújo Mendonça, hato'o agradese ba Embaixadór Japaun iha TL ne'ebé servisu diak tebes ho governu TL hodi halo kooperasaun ho kompañia Kochi agrikola ne'ebé simu ona traballadór timoroan.
SEFOPE dehan, traballadór timoroan ne'ebé kompañia Kochi simu hamutuk 14, maibé ida rezigna an no hela de'it na’in 13.
Tan ne’e, iha faze dahuluk, traballadór na’in hitu mak sei ba halo estajiu no na’in neen seluk sei aranka iha tempu tuir mai no tama iha faze daruak.
"Ha'u senti orgullo tebes tanba foin primeira vez ita nia estadu TL ho nasaun Japaun liu husi kompaña Agrikola Kochi halo akordu ida ba iha traballadores ne’ebé sei ba servisu iha Japaun durasaun tinan tolu," dehan Sekretáriu iha Salaun SEFOPE Kaikoli, Kinta (14/09).
Governante ne’e afirma, husi durasaun tinan tolu ne’e kompaña halo avaliasaun bainhira progresu husi traballadór ne’e iha vontade diak atu halo servisu, entaun sei extende to’o tinan tolu, maibé ba sira ne'ebé komportamentu ladiak, otomatikamente tinan ida kompaña sei hapara sira nia viza.
Nia hatutan, traballadór na’in hitu sai hanesan xave, tan ne’e, bainhira sira ba servisu iha ne’ebá tenki hatudu komportamentu di'ak, tanba kultura Japaun ne'e importante, tenki respeitu ema seluk nia kultura no hanesan traballadór tenki hatudu progressu iha servisu.
“Se ita boot na’in hitu ne’ebé hetan oportunidade ne’e mak iha komportamentu diak otomamatikamente fó ona espasu ba ita nia Timoroan, ba ita nia joven sira ne'ebé atu ba, maibé se ita boot sira mak hatudu komportamentu ladiak signifika sei taka dalan ba maluk sira seluk,” SEFOPE hato’o.
Iha fatin hanesan, Embaixadór Japaun iha TL Tetsuya Kimura hatete, loron ohin ne'e memoravél ba kompaña husi grupu Agrikola Kochi nian, ne'ebé sei akompaña grupu dahuluk joven Timoroan sira ne'ebé sei servisu hamutuk ho sira iha tinan barak oin mai.
“Ida ne'e loron ida memorável tebes ba traballador na'in hitu (7) ne'ebé atu aranka ba Japaun liuhusi programa ida ne'e. Ha'u fiar katak ita bo'ot sira nakonu ho esperansa no ekspektasaun, atu aprende abilidade agrikola wainhira sei iha Japaun no kontribui ba konstrusaun nasaun TL ho abilidade hirak ne'e wainhira imi fila,” nia afirma.
Nia dehan, abilidade sira kona ba kultivasaun modo no aifuan sira ne'ebé sei hetan iha Kochi, provincia ida avansadu liu em termu de agrikola iha Japaun, Japaun hein katak traballador sira sei konduz setor agrikola iha TL atu buras liu wainhira fila mai Timor-Leste.
Partisipasaun joven Timor-oan sira iha Programa Estajiariu Tekniku Japaun nian sei fo vantajen maka'as, tantu ba Japaun ho nia sosiedade envelesida (ferik-katuas sira) bo'ot no mós ba Timor-Leste nia proporsaun joven ida bo'ot tebes.
Tan ne’e, embaixadór husu ba familia sira ne'ebé despede ona oan sira fiar katak provinsia Kochi sei tau matan ba sira, tanba sira nia sistema atu simu traballador sira existe tiha ona.
Iha biban ne’e familia traballadór Estrarlino Martins husu ba traballadór sira atu kumpri no halo tuir saida mak iha lei ne'ebé kordena ona ho traballdór sira, labele kontra saida mak nai-ulun sira hatoo ona.
