Tuir komunikadu ne’ebé Online INDEPENDENTE asesu, bolsu estudu ne’e fó apoio tinan ida ba individu sira mak bele demonstra potensia atu sai lider iha futuru, sai ema ne’ebe foti desizaun, no ema ne’ebé forma opiniaun públiku atu halo estudu mestradu iha universidade sira iha Reinu Unidu.
Enkuantu, aplikasaun ba eskema bolsu estudu prestijiu husi Reinu Unidu, Chevening, hahú loke hosi 12 Setembru to’o ba 7 Novembru 2023.
Tuir Embaixadór Britanika, Dominic Jerney, hatete, ba tinan 40, Chevening kria ona mudansa positivu iha mundu. Programa Chevening iha Timor-Leste hetan susesu hodi identifika futuru lideransa no ema ne’ebé bele halo influensia iha nasaun laran no bele hetan pozisaun senior no pozisaun influensidu, liliu ba iha governo nia laran.
Tuir nia, La iha opurtunidade seluk ida mak fó ba estudante ho tipu hanesan ne’e no la hare ba tinan, rasa, jeneru, relijiaun no mós orijen kultural la importante.
“Ami hakarak hare katak imi iha enerjia, kuriosidade, kompaisaun, vizaun klaru ba imi nia futuru no abilidade hodi atinji objetivus. Se ida ne’e ita bot hakarak, entaun ita boot serve atu tama iha ami nia komunidade mak iha alumni nain 55,000 iha mundu tomak,”dehan nia, iha komunikadu ne’ebé Online ne’e sita.
“Ami nia rede alumni dinamiku tebes no nakonu ho ema mak iha influensia, no sira mós iha experiensia mak ita boot mós sei hetan. Sira bele oferese enkorajamentu, mentoria, fó konseilu, no fó kontaktu. Bainhira imi fila mai imi nia rai hafoin kompleta imi nia estudu, imi sei sente katak imi iha kbi’it atu halo diferensa iha Timor-Leste. Iha buat barak mak imi sei hetan bainhira hatama aplikasaun ne’ebe diak, entaun bainhira imi priense kriteria sira mak bele sai nudar Estudantes Chevening nian, hau enkoraja imi atu hatama imi nia aplikasaun antes 7 Novembru,”tenik Embaixadór ne’e.
Xefe Bolsu Estudu iha Sekretaria Relasaun Externa, Commonwealth no Dezenvolvimentu (FCDO), Emma Hennessey, hatete, estudiozu Chevening, Bolsista, no Eis-Estudantes ka alumni uza sira nia abilidade no kuiñesementu mak sira hetan bainhira estuda iha Reinu Unidu atu halo mudansa, promove moris diak, kria espasu moris seguru ba ema hotu iha mundu atu moris, servisu no krese.
“Chevening reprezenta Reinu Unidu ho diak liu iha mundu no mos ami nia estudiozu sira sai nuudar parte rede global Chevening nian mak iha eis-estudantes liu nain 55,000. Ha’u sempre inspiradu ho paisaun no komitmentu hosi sira ne’ebe involve iha komunidade Chevening nian no hau hakarak hetan lalais aplikasaun sira husi jerasaun tuir mai,” dehan Emma Hennessey.
Entretantu, iha 2023 marka tinan 40 aniversariu Bolsu Estudu Chevening nian.
Hahú husi kedas kriasaun programa ne’e iha 1983, iha profesionais nain 55,000 mak hetan tiha ona opurtunidade atu lori sira nia kareira ba nivel seluk liu hosi Chevening, bolsu estudu ida ne’ebe agora dadaun iha alumni ema nain 20 mak sai ona nuudar xefe estadu ka xefe governu.
Aproximadamente iha premiadu nain 1,500 mak globalmente sei hetan bolsu ne’e iha tinan akademiku 2024/2025, ne’e hatudu komitmentu Reinu Unidu nian ba dezenvolvimentu lideres futuru nian, hodi selebra Chevening nia aniversariu dala 40.
Iha eis-estudantes Chevening nain 50 mak iha Timor-Leste no sira iha abilidade professional ba area oioin, inklui atu ajuda fo solusaun ba mudansa klimatiku, sai kampiaun ba igualidade jeneru, serbisu iha industria media, governo, bisnis, serbisu iha area legal nian no mos selu-seluk tan.
Notabelmente alumni Chevening iha Timor-Leste ne’e inklui Ministru Negosiu Estranjeiru no Kooperasaun, Bendito dos Santos Freitas no Premeiru Sekretariu ba Misaun Permanente Timor-Leste nian iha Eskritoriu Nasoens Unidas no organizasaun internasional sira seluk, Didina Maria Assunção Coelho Da Silva.
Enkuantu, bolsu estudu ne’e oferese apoio finansial total ba estudantes ne’ebe atu estuda iha nivel mestradu nian iha universidade 150 iha Reinu Unidu no mós bele asesu ba opurtunidade eklusivu akademiku oioin, oportunidade profesional no mós esperiensia kultural.
Aplikasaun bele hatama tuir dalan priense formulariu online iha chevening.org/apply.
