Sekretáriu Estadu Floresta, Fernandino Vieira da Costa hato’o kestaun ne’e bainhira halo serimonia inaugurasaun reabilitasaun ba irrigasaun ne’ebé hetan estragus inundasaun iha 04 Abril 2021, iha suku Aiteas Postu Adminitrativu Manatuto Villa, Munisipiu Manatuto.
Sekretáriu Estadu Floresta, Fernandino Vieira da Costa hatete, Governu konstituisionál dasia agradese tebes ba Xefe Maiór Jenerál Falintil-Forsa Defeza Timor-Leste (F-FDTL), Tenente Jenerál Domingos Raul “Falur Rate Laek” ho nia Ekipa tekniku Enjenaria F-FDTL no Autoridade Postu, Prezidente Autoridade Munisipiu Manatuto ne’ebé ho inisiativa halo servisu halo reabilitasaun ba irrigasaun iha Suku Iliheutoo, hodi distribui bee ba komunidade sira-nia natar ektare 600 resin ne'ebé hetan estragus husi inundasaun iha loron 04 Abril 2021.
Nia dehan, programa Ministériu Agrikultura Pekuária Peska no Floresta (MAPPF), iha Governu konstitusionál dasia nian sei halo rehabilitasaun ba irrigasaun sira ne’ebe iha teritoriu Timor Laran tomak no sosa tratór hodi fahe ba Munisípiu sira ne’ebé presija hodi fila rai.
Nia informa, iha tinan ida ne’e ekipa MAPPF sei halo estudu viabilidade ba irigasun rua (2) hanesan irigasaun Laklo no irigasaun Samalai iha Laleia, tanba irrigasaun ida-ne’e importante tebes nesesidade povu agrukultura ni’an.
“Ita iha 400 irrigasaun ne’ebé iha teritóriu Timor Laran tomak no iha irrigasaun boot, mediu no nato’on, balun iha faze kontrusaun no rehabilitasaun ida-ne’e maka ita hala'o iha tinan ida -ne’e bazeia ba orsamentu ne’ebé aprova iha Parlamentu Nasional,” Dehan Sekretáriu Estadu Floreta, Fernandino liu husi Komunikadu Imprensa ne’ebé Jornal INDEPENDENTE asesu, iha Pajina SEF, Sexta (16/2).
Nia haktuir, iha serimonia ne’e mos governu toma nota hela asuntu floresta nian ne’ebé importante tebes hodi bele halo protesaun ba rai no mota, atu labele fo ameansa ba komunidade sira ne’ebé hela besik. Tamba iha área ida-ne’e kritiku tebes bainhira bai-loron naruk no bele hamosu rai manas, tanba menus ai-hun.
“Hau sei orienta tékniku sira hodi mai halo sosializasaun no halo observasaun ba rai hodi halo enkontru ho komunidade sira hodi governu bele apoiu iha parte floresta ni’an, tanba ita lakohi rai sira ne’e mamuk laiha plantasun ruma,” Nia relata.
Nia fundamenta, iha vizita Ministru Floresta Korea do Súl, NAM Sung Hyum mai iha Timor-Leste fahe mos sira-nia esperiensia tinan 50 ba kotuk, maibe komunidade sira iha vontade hodi hamutuk ho governu Korea hodi kuda ai iha foho lolon sira hodi hamatak fila-fali, dadaun ne’e Korea sai hanesan Lalehan daruak iha mundu.
“Aproveita oportunidade ida ne’e hakarak hato’o ba komunidade sira katak Floresta sei halo viveirus komunitariu ida iha suku ida-ne’e, atu nune’e komunidade sira-ne’ebé hela besik iha ne’e bele mai fori hodi ba kuda iha sira-nia plantasun, tanba tuir programa nonu governu konstitusional iha Floresta nian, sei produs ai tokon ida, iha tinan ida, tanba ne’e governu liu husi Sekretáriu de Estadu das Florestas sei apoiu komunidade sira hodi halo viveirus komunitariu ida iha fatin ne’e,” Nia relata.
Nia akresenta, SEF agradese klean ba Tenente Jeneral Falur Rate Laek ho nia ekipa tomak no Administradora sesante ho nia ekipa servisu ne’ebé durante ne’e iha inisiativa hodi rehabilita irrigasaun ida-ne’e, nune'e komunidade sira bele utiliza fila-fali hodi halo natar.
