Ministru Ensinu Superior Siénsia no Kultura, José Honório da Costa Pereira Jerónimo, hato’o lia hirak ne'e ba UNTL iha ámbitu inagurasaun ba edifísiu foun Fakuldade Agrikultura nia iha Hera.
"Tau iha hanoin katak UNTL tenke sai ezemplár di’ak ba instituisaun sira seluk, ita lakohi instituisaun privadu sira mak sai fali ezemplu mai ita, maibé nu’udar instituisaun públiku tenke sai ezemplu diak ba sira seluk," dehan Ministru José Honório iha nia diskursu, kampus Hera, Sesta (16/02).
Ministru José Honório informa, Governu kompromitidu sei nafatin apoiu UNTL iha ativadade hotu ne'ebé presiza tulun husi Governu.
Nune'e husu ba Fakuldade Agrikultura (FA) ne'ebé iha ona edifisiu foun, atu utiliza didi’ak patrimóniu estadu nian no uza ho kuidadu, tanba investimentu ne’ebé governu apoiu ne'e hodi benefisia ba futuru.
"Edifísiu foun ne’e bele garante kualidade UNTL nian iha futuru. Ne’e investimentu ne’ebé governu halo liuliu ba UNTL no husu ita atu kuidadu hodi aposta ba futuru joven sira iha Timor-Leste”, tenik Ministru.
Iha fatin hanesan, Reitór UNTL, João Soares Martins, agradese ba governu ne’ebé bele disponibiliza ona orsamentu ba konstrusaun edifísiu tolu, hodi fasilita prosesu ensinu apredizajen universidade nian, liuliu ba Faculdade de Agrikultura.
“Agradese tebes ba Governu liuhusi MESSK, ne’ebé disponibliza ona orsamentu mai UNTL ba konstrusaun ida-ne’e, nune’e bele responde ba preokupasaun fakuldade nian liga ba sala-de-aula,” dehan Reitór.
Reitor mós solisita ba estrutura Fakuldade Agrikultura atu utiliza edifísiu ho di’ak, nune’e bele transforma Hera sai hanesan fatin sidade agrikultura no teknolojia ho siénsia moderna ba UNTL no Timor-Leste.
Nune'e mós agradese ba kompañia tolu, Bobolait, Dany Star no Hedge Construction ne’ebé finaliza ona konstrusaun edifísiu foun ne’e bele garante kualidade UNTL nian iha futuru.
“Agradese ba kompañia tolu ne’ebé bele servisu hamutuk ho UNTL, hodi konklui projetu edifísiu tolu ne’e. Ne’e investimentu ne’ebé governu halo liuliu ba UNTL," ténik reitór.
Entretantu edifisiu foun Fakuldade Agrikultura ne'e lansa fatuk dahuluk husi VIII Governu Konstitusional iha tinan 2021 ho orsamentu por volta milliaun $2. Enkuantu edifisiu foun tolu ne'e ida fatin ba profesór sira no rua ba estudante sira ho nia kapasidade total sala hamutuk 32.
