Diretór ezekutivu FDCH, Júlio Aparicio husu estudante sira ne'ebé aplika bolsu hakbiit atu pasiénsia hodi hein prosesu pagamentu, tanba prosesu sira ne’e presiza verifika didi’ak, liu-liu haree valór médiu ba traskrisaun hira no estudante refere sei pro-ativu ka lae, nune’e FDCH sei haree, depois mak halo pagamentu.
“Ita simu estudante ba bolsu hakbiit iha rai laran no rai liur nian, kuaze rihun 3 resin, nunee parte FDCH sei halo prosesu tuir kritéria normál, no halo verifikasaun ba proposta hotu-hotu depois halo pagamentu,” dehan Diretor Ezekutivu FDCH, Julio Aparicio, iha nia knaar fatin, Liceu, Sesta (16/02).
Durante ne’e estudante barak mak subtitui dokumentu no balun halo proposta liu husi Gabinete Primeiru Ministru nian, tanba ne'e presija halo verifikasaun molok halo pagamentu.
Husu estudante hotu-hotu ne’ebé aplika bolsu hakbiit atu pasiénsia hein prosesu pagamentu, tanba prosesu sira ne’e verifika didi’ak, liu-liu haree valór médiu ba traskrisaun hira no estudante refere sei pro-ativu ka lae, nune’e FDCH sei haree, depois mak halo pagamentu. Tanba dalaruma dokumentus balun ilegál iklui estudante balun finaliza ona mós sei halo proposta, entaun nee bele disturba.
“Ita presiza halo verifikasaun kle’an ba bolseiru parsiál sira iha rai laran no rai liur nian, tanba iha dokumentus balun ne'ebé ita deskonfia ilegál mós, inklui estudante sira ne'ebé remata ona sira nia estudu ne'e,” dehan nia.
Iha sorin seluk, bolseiru husi Estudante Universidade Dili (UNDIL), Aida Correia Belo, hateten, agradese tanba tinan ida ne'e FDCH sei halo verifikasaun kle’an molok halo pagamentu. Hodi bele rezolve mós sira-nia problema ne'ebé durante ne’e sira hasoru.
"Dezafius mak dalaruma pagamentu la tuir fulan ne'ebé determinadu entaun ida ne’e hanesan problema mai ami tanba ami tenke hein kleur. Ne'ebé espera liu husi verifikasaun ida ne'e prosesu hotu la’o di’ak liu fali prosesu sira anteriór nia," nia informa.
Nia hatutan, tanba objetivu husi programa FDCH ne'e atu haree potensialidade no prioridades ema nian, liu-liu rekursus umanus iha rai laran, nunee parte FDCH bele tau atensaun ba ida ne'e.
Tanba politika governu loke FDCH nee atu haree kualidade estudante nian, neebe sai rekursus umanus iha rai laran, oinsa bele responde potensialidades no programa prioridade sira.
“Nu’udar bolseiru orgulhu boot, tanba parte FDCH durante ne’e suporta no apoiu ha’u-nia prosesu estudu iha nível ensinu superior. Loos duni katak ita presiza duni hasa’e ita-nia rekursus umanus iha area hotu-hotu, entaun parte relevante tenki fo prioridade ba estudante hotu neebe iha inisiativu diak ba prosesu estudu," dehan nia.
