SEATOU Husu Negosiante Koopera Ho Governu Hadi’a Sidade Featured

By Ivonia Varela Fevereiru 22, 2024 175
Sekretariu Estadu Asuntu Toponomia Urbana (SEATOU) Germano Santa Brites. Foto: INDEPENDENTE. Sekretariu Estadu Asuntu Toponomia Urbana (SEATOU) Germano Santa Brites. Foto: INDEPENDENTE.

DILI: Governu liu husi Sekretariu Estadu Asuntu Toponomia Organizasaun Urbana (SEATOU) husu ba negosiante sira ne’ebé fa’an obralan iha Ai-mutin tenki koopera ho governu hodi bele hadi’a sidade Dili sai sidade ne’ebé moos.

Sekretariu Estadu Asuntu Toponomia Urbana (SEATOU) Germano Santa Brites hatete, razaun hasai vendedór sira iha ai-mutin tanba governu atu hadi’a estrada no bee dalan no bainhira di’ak atu ema hotu uza tan ne’e husu ba negosiante sira hotu-hotu tenki muda hotu ba merkadu Manleuana, atu nune’e governu bele hadi’a estrada no valeta hodi evita inunsasaun.
“hakarak ka lakohi mákina tenki mai hadi’a alkatraun ne’e didi’ak bainhira di’ak ona ita-boot sira mak sei uza, governu prepara ba ita hotu tanba ne’e ita-boot sira tenki haka’an hotu-hotu tenki muda ba merkadu Manleuana,” dehan nia iha Ai-mutin, Kuarta (21/02).
Governante afirma, Governu la hanoin aat no la fó susar ba nia povu tan ne’e povu tenki koopera di’ak ho governu atu nune’e bele jere situasaun ne’e ho di’ak, sidade la’o diak, no obralan nia fatin tenke prepara ona.
Nia salienta tan katak, governu prepara identifika ona fatin iha merkadu Manleuana ba negosiante sira tan husu ba negosiante sira atu haree fatin iha merkadu refere mak sei mamuk utiliza de’it.
Enkuantu, negosiante Jeni Selviana hatete, sira prontu kopera hodi halo tuir, ekipa husi jestaun merkadoria ba sobu sira nia fatin atu muda sira ba fatin ne’ebé governu prepara ona, maibé sira ba to’o iha Manleauna fatin la iha ba sira.
“informasaun ne’ebé ami rona dehan governu prepara ona fatin, ne’e mak ohin ami ba maibé fatin ida la iha ida ne’e ami mai rekere nafatin, tenki hatudu fatin ne’ebé dignu ba sira atu nune’e ami bele fa’an fali ami-nia sasan hodi sustenta fali ami-nia moris loron-loron,” dehan negosiante.
Xefe Aldeia Sao Miguel Hermengildo de Araújo hatete, hanesan lideransa ida ba nia povu bele koopera, tan ne’e atu tempu saida de’it mak atu hasai nia povu sira simu, maibé tenki aranja fatin ida sira.
“ha’u nia ema imi bele hasai maibé tenki iha fatin ba sira, tanba sira ne’e maioria moris ho ida ne’e, no barak mak moris hela ho kréditu se sira la fa’an saida mak sira atu uza, ne’ebé ha’u hanesan lideransa iha aldeia hau labele buka fatin ba ha’u nia ema tanba ne’e estadu nia tan ne’e estdau mak bele buka fatin ba sira,” katak Xefe Aldeia.
Akresenta tan katak, Se karik estadu seidauk kria fatin ba negosiante sira mak hanesan liderasan sei la fó ulun atu hasain ninia ema sira.
Enkuatu, negosiante ne’ebé hala’o negosiu iha Ai-mutin hamutuk 257 ne’ebé kompostu husi Aldeia São Miguel 105 no Aldeia Postu Penal 152.

Rate this item
(0 votes)
Last modified on Kinta, 22 Fevereiru 2024 11:44

Independente Digital TV

Tuir ami iha Twitter

Kalendariu Notisia

« April 2024 »
Mon Tue Wed Thu Fri Sat Sun
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30