Negosiante Felizarda de Piedade hatete, sira prontu koopera ho governu atu hasai sira husi fa’an fatin maibé governu tenki kria uluk fatin ba sira, tanba sira nia moris loron-loron depedensia de’it ba fatin ne’e.
Nia dehan, liu husi fatin ne’e sira bele fa’an obralan hodi hetan osan hodi sustenta sira-nia moris no haree ba oan sira-nia eskola, tanba ne’e husu ba governu tenki kria uluk kondisaun.
“Hanesan povu ami hatene tanba povu iha estadu nia okos, maibé governu tenki kumpri iha kampaña sira ko’alia ne’e katak bainhira sira ukun hadi’a uluk povu nia moris, tan ne’e tenki haree tanba ami nia moris mak loron-loron iha valeta ku’ak no trotoar leten,” dehan negosiante ne’e ba Jornalista iha Ai-mutin, Kuarta (21/02).
Iha fatin hanesan, negosiante Florensa Barros dehan, antes ne’e governu liu husi munisípiu Dili fó hatene ona sira katak governu prepara ona fatin iha merkadu maleuana ne’e ba sira, atu nun’e sira bele fa’an sasan iha merkadu manleuana maibé realidade fatin seidauk iha ba sira.
“antes ne’e iha ona informasaun sira atu sobu fatin ne’e maibé sira sei prepara fatin iha Merkadu Manleuna atu nune’e ami vendedor sira bele ba fa’an fali iha ne’ebá, no ohin sira mai sobu maibé sira seidauk prepara fatin ba ami, no kolega vendedor sira ba ona iha hare maibé fatin seidauk prepara,” dehan nia.
Negosiante afirma, maske governu sobu ona sira nafatin sem prepara kondisaun ba sira, sira sei harí fila-fali Baraka hirak ne’e hodi kontinua fa’an fali sasan iha fatin refere.
Hatan ba kestaun ne’e, Diretór Servisu Jestaun Merkadu Munispiu Dili Artur Henrique hatete, relasiona ho vizitasaun Amu Papa mai TL ne’e mak Governu atu hadi’a bee dalan no estrada iha fatin refere tan ne’e governu haruka sira sai, maibé governus sei kria fatin provizorio ba sira.
Maibé karik, ekipa jestaun merkadu munisípiu sobu ona mak sira hakarak fa’an fila-fali iha fatin ne’e, la’on kestaun ninian tanba ekipa sira tuir de’it orientasaun husi governu sira.
“Sira hakarak kontinua fa’an fila fali iha fatin ne’e, ne’e laos kulpa ha’u nian tanba ne’e desizaun, se kontinua fa’an ne’e kunsikuensia, ha’u hanesan ezekutadór ha’u implementa orientasaun husi leten,” nia hakotu