Nia dehan, sira presiza tebes seguransa atu apoiu tanba fatin eskola 10 Dezembro nee nu’udar fatin konflitu.
“Eskola 10 Dezembro ne'e nu’udar fatin konflitu, tanba ne’e husu ba ME atu konsidera netik no apoiu seguransa ida mai iha iha eskola ne'e, atu bele salva ita nia dezenvolvimentu ne'ebe iha para garante ba ami profesór sira hodi hala'o ami-nia knaar ho di’ak. Tanba fatin ida ne’e fatin risku mai ami profesor sira," Dehan diretór EBC 10 Dezembro, Nicolau Amaral, iha knaar fatin, Komoro, Kuarta (21/02).
Nia afirma, atu kria kondisaun diak to'o iha ne'ebé mós bainhira la iha seguransa la garante ambiente seguru.
“Ita bele kria kondisaun to'o iha ne'ebé mais seguransa la masimu ida ne’e mos ha’u haree perturba ba atividade ne'ebé iha no la garante ambiente seguru," dehan nia.
Diretór ne'e realsa, karik ME fó resposta ba sira-nia pedidu mak sira presiza seguransa na’in rua atu apoiu sira.
“ME fo resposta, ami hakarak guarda eskola rua, atu ami bele koloka tuir nesesidade eskola nia ne'ebe mak iha. Ita iha mais seidauk sufisiente no ita presija tan tanba iha fatin ne’e fatin ida ne’ebe mak luan, fatin ida ne'ebé mak risku oituan entaun ita presiza duni guarda eskola nia apoiu iha loron no kalan mós ita bele antisipa,” nia informa.
Hatan ba kestaun ne'e, Sekretariu Estadu Edukasaun Ensinu Sekundáriu Jerál no Eskola Tékniku Vokasionál (SEEESJ-TV), Domingos Lopes Lemos hateten, sira anota ona maibé sei haree lai depois mak koloka seguransa.
"Ita konsidera no kona-ba seguransa depois ministériu sei haree lai ida ne’e mak foin bele destaka seguransa iha ne'e, karik posível duni no fatin ne'e nesesita atu koloka seguransa mai iha ne’e bele, ne’e la’os probelam ida ba ita no Ita mos destaka bazeia ba sira presija,”nia dehan.
Tanba sira presiza seguransa ne'e mós oinsa atu mantein ambiente ne'ebé seguru ba estudante, profesór inklui tau matan ba fasilidade sira ne'ebé iha eskola.