Tuir planu governu sei hadi'a estrada hahú matadoru to'o iha mota ibun maloa no kontinua to'o ailook laran inkliu dalan husi ministériu eduksaun nian to'o iha kruzamentu tuana laran.
Ho nune'e, Sekretariu Estadu Asuntu Toponimia Organizasaun Urbana Germano Santa Brites Dias husu ba komunidade atu koopera ho estadu hodi halo dezenvolvimentu iha kapital Dili.
"Ohin (horseik) ha'u mai iha ne'e atu koalia ho ita boot sira kona-bá dezenvolvimentu ne'ebé sei akontese iha bairo ida ne'e iha pontu tolu ne'ebé importante tebes, pontu ida mak husi eduksaun nia sei mosu iha kruzamentu, no ida husi kruzamentu ida nee too mota Maloa, no ida seluk husi mota Maloa to'o iha Ailook laran," dehan SEATOU iha Sede Suku Vila-Verde, Tersa (21/01).
Sekretariu Estadu dehan, MOP mai kedas ho nia medida ba estrada urbana no estrada rural sira. Nune'e medidas ne'ebé ekipa tekniku sei foti minimu liu mak metro 10 husi estrada.
Governante ne’e hateten, bainhira ekipa husi Ministériu Obras Públika (MOP) tun ba sukat estrada komunidade sira tenki kopera, no fó dadus ne’ebé los, atu nune'e ekipa sira bele halo kalkulasaun ba nia gastus, tanba rai ne'ebé komunidadesira hela ba maioria rai privadu.
"Ba komunidade sira ne'ebé sei kona-bá Alargamentu tenki kontribui, tan nee bainhira kona-bá ona iha obrigada ba koalia ho obras publika para hare ita boot sira nia kerakmik ka simenti hira no uma noa ai rin nia as no kle'an hira tenki fó biban ba tekniku husi Ministériu Obras Públika hodi tau rumu ne'ebé governu prepara hodi hatene nia gasrus ne'e hira," katak SEATOU.
Sekretariu Planeamentu Investimentu Dezenvolvimentu munisipiu Dili, Francisco dos Santos hatete, governu idak-idak mai ho nia planu, la iha governu ida atu estraga nia povu tanba nee governu eziste atu organiza no hadi'a.
"Iha kada governu iha planu, la iha governu atu planu hodi estraga nia povu governu mai atu organiza atu hadi'a buat ruma ne'ebé seidauk diak kontinua hadia no ida ne’ebé anterior hadi'a ona governu mai atu kontinua," dehan Francisco.
Enkuantu, ekipa konjunta ne’ebé halo sosializasaun ba komunidade sira kompostu husi seatou, Ministeriu Justisa liu husi Diresaun Terras no Propriedade, Ministériu Obras Públika inklui autoridade lokal sira.
