Peregrinu hosi munisípiu Baucau, Abilio Soares (idade 59) hatete, hahú tuku neen sira aranka sai hosi fatin destinasaun hodi mai iha Tasi-tolu, atu partisipa misa ne’ebé prezide hosi Sua Santidade Papa Franscisco.
Nia dehan, nia parte kontente tanba bele mai tuir misa iha Tasi-tolu hodi simu bensaun hosi Santu Papa.
"Ha'u kontenti atu haree Amu Papa, ami sai hosi Hudi-laran tuku neen atu mai tuir misa no simu bensaun, horiseik ha'u haree liu de’it tanba kareta halai lalais liu," dehan Abilio ba Jornalista INDEPEDENTE iha Tasi-Tolu, Tersa (10/09).
Nia dehan maske loron manas maibé nia la senti kolen, tanba hakarak duni atu simu bensaun hosi Amu Papa.
Tuir Observasaun Jonalista INDEPENDENTE nia iha terenu nota katak, iha oras tulun hitu liu sarani sira hahú forma ona iha portaun A, B no C ne'ebé mak mak prepara ona.
Maske sarani sira hamriik nakonu no forma iha loron manas maibé la iha dezitendimentu ruma tanba kontrolo másimu hosi parte seguransa. No sarani sira tama portaun laran tuir munisipiu ida-idak.
Tuir oráriu, Papa Francisco sei vizita labarik sira ema ho defisiensia (moras autis) ne'ebé hela iha orfonatu (ALMA) iha Pantai Kelapa, Dili.
Iha tuku 09h30, Papa Fransico sei halo sorumutu ho bispu, padre, madre, diákonu, seminarista no katekista sira iha igreja Imaculada Conceição Katedrál Vila Verde, Dili.
