Sarani Suku Bemori, Domingos Soares de Jesus haktuir, sira hakarak ba sedu hodi la’o neneik ba Tasi-tolu hodi tuir misa, tanba ohin loron tenke sakrifika aan hodi simu bensaun husi Amu Papa.
“Ha'u kontente teb-tebes, tanba durante iha momentu 1989 ne'e ha'u la konsege partisipa ne'ebé agora Amu Papa mai fali rai timor mak ha'u la ba misa berarti (signifika) ha'u lakon ha'u nia domin husi Amu Papa,tenke ser ba para haree direitamente simu bensaun,” Dehan nia ba jornalista INDEPENDENTE, iha Bemori ohin.
Nia dehan, tanba vizita Amu papa mai TL sai istória boot ida ba nia para hodi simu bensaun atu bele hetan isin di'ak saúde nafatin iha futuru.
Maske Misa iha Lorokraik, nia relata, tenke ba sedu tanba oras besik mak ba Tasi-tolu sei la biban, tanba misa oras ida ho balun ne'ebé hakarak ka lakoi ba sedu hodi bele hetan fatin.
“Ami tenke sai sedu la’o neneik para to'o iha ne'ebá para prepara an hodi hanoin orasaun bainhira tama misa hahú,tanba loron tomak ohin ne'e ami tenke iha ne'ebá,” Nia relata.
Tuir Observasaun iha Terenu sarani sira husi Parokia Baukau ne'ebé konsentra iha suku Hera ne'ebé mai husi parókia keta-ketak hanesan Munisipiu Lautém,Vikeke,Manatutu,Baukau mós komesa ho ida-idak nia karreta komesa ba ona Tasi-tolu hodi tama ba area misa nian, tuir orariu ne'ebé komisaun fó-sai ona.
