Sarani Eliza Moniz de Rosa, hosi Parókia Dare Munisípiu Aileu hato'o nia sentimentu kontente tanba ohin Papa Francisco mai nasaun Timor-Leste.
"Ami kontente tebes tanba ohin vizita amu Papa Francisco mai nasaun Timor-Leste, ami hotu hakarak mai hamriik iha estrada ne'e, maske loron manas, ema barak maibé ami kontente tanba bele hamriik iha ne'e hodi simu bensaun hosi amu Papa Francisco," dehan Sarani Eliza ba jornalista INDEPENDENTE iha Rotunda Nicolau Lobato Komoro, Segunda (09/09).
Nia dehan, esperansa katak hein hela iha dalan ne'e hakarak kaer Papa Francisco liman, maibé depende ba regra ne'ebé hosi protokolu sira hato'o katak labele, entaun hamriik de'it simu bensaun hosi do'ok mós kontente ona.
"Ami ohin mak sedu de'it tanba ami prepara anju sira atu simu Papa Francisco ne'e orsida ami sei fali aprezenta uitoan ne'e mak ami mai sedu hodi dada tiha fita ne'e, atu ami hamriik iha ne'e, ami mai oras 07:00 to'o agora," hatete nia.
Nia afirma, tanba ho prezensa Amu Papa Francisco nian ne'e nasaun Timor Leste bele hetan pás, hakmatek, dame iha nasaun iha Timor Leste.
Entretantu, Sarani Claudina Goncalves hosi Parókia Aileu mós sente kontente no orgullu tebe-tebes nu'udar sarani Katólika hein Papa Francisco nia prezensa mai Timor Leste.
"Ami sente kontente no orgullu tebe-tebes nu'udar sarani ho amu Papa Francisco nia vizita ida ne'e, tanba nu'udar sarani Katólika, ita iha esperansa bo'ot ida katak amu Papa Francisco nia vizita ida ne'e bele lori dame no pás ba rai Timor ida ne'e," haktuir nia.
Nia haktuir, maske loron manas maibé la sente kolen, tanba komisaun organizadór sira fasilita hela sumbriña hodi taka hein Prezensa Papa Francisco.
Tuir observasaun jornalista iha terenu nota katak sarani sira entuziasmu forma hosi Rotunda Nicolau Lobato nian falun ha'u sumbriña ho kór oi-oin, balun ida sumbriña ne'ebé komisaun organizadór sira fahe ba sira no balun uza sira-nian rasik.
Tuir oráriu ne’ebé deside, Papa Francisco hamutuk ho delegasaun sei voo husi Papua Novaguine mai Dili-Timor-Leste sei to'o iha Aeroportu Internasionál Nicolau Lobato, Comoro, iha tuku 14h10.
Hafoin Papa Francisco to'o iha Aeroportu Comoro, Papa ho nia delegasaun sei simu husi Xefe Estadu no Governu no bispu sira iha Timor-Leste, hafoin ne'e Papa sei ba deskansa iha Nunsiatura Apostolika iha Motael, Dili.
18:00 lorokraik, Papa Francisco ne'ebé hanesan Xefe Estadu Vatikanu nian ne'e sei ba iha Palásiu Prezidensiál Nicolau Lobato, Bairru Pite, hodi hala'o enkontru ho Prezidente Republika, José Ramos Horta. Iha oras hanesan, Primeiru-Ministru, Kay Rala Xanana Gusmão, sei hasoru malu ho ninia omologu Kardinal Pietro Parolin, ne'ebé sei la'o durante minutu 20 nia laran.
Iha Palasiu Prezidensiál Nicolau Lobato, iha tuku 19h00 kalan ne'e, Papa Francisco sei lee ninia diskursu ne'ebé partisipa husi Xefe Governu no membru Governu da-sia (IX), sosiedade sivil, korpu diplomátiku no konvidadu sira seluk hafoin fila hikas ba Nunsiatura Apostólika Motael.
Iha tersa (10 setembru 2024), iha tuku 08h45 dadeersan, Papa Francisco sei vizita labarik sira ema ho defisiensia (moras autis) ne'ebé hela iha orfonatu (ALMA) iha Pantai Kelapa, Dili.
Iha tuku 09h30, Papa Fransico sei halo sorumutu ho bispu, padre, madre, diaknu, seminarista no katekista sira iha igreja Imaculda Conceição Katedrál Vila Verde, Dili.
Iha tuku 10h45 Papa Francisco sei halo sorumutu ho padre na'in-38 husi kongregasaun Jesuita iha Timor-Leste iha rezidensia Nunsiatura Apostólika iha Motael, Dili.
Iha tuku 16h30 lorokraik, Papa Francisco sei prezide misa solene iha Tasi-Tolu, misa ne'e la'o durante oras ida ho balun de'it, no sarani sira simu komuñaun kala la'o minutu 10 nia laran deit.
Iha kuarta (11 September 2024), tuku 09h30, Papa Francisco sei hala'o sorumutu no sei fó diskursu ba reprezentante juventude katólika husi dioseze Dili, Baucau no Maliana hamutuk 3.000
Hafoin sorumutu ne'e, iha tuku 10h45, sei halo serimónia despedida iha aeroportu Internasionál Prezdidente Nisolau Lobato, Comoro, Dili, antes Papa Francisco ho delegasaun sei voo ba Singapura.
