Hanesan sidadaun ida sente triste tanba durante tinan sanulu (10) ho voluntariamente apoia no fó ona kontribuisaun ba nasaun liu husi setór edukasaun hanesan hanorin estudante sira, maibégovernu kontinua la konsidera sira-nia dedikasaun.
Profesora Ensinu Sekundaria Herois da Pátria Bekora Amália Rodrigues Ximenes hatete, hanorin ona iha eskola durante tinan sanulu resin hahú husi tinan 2012 to’o 2022, hafoin governu anterior hodi fó kontratu maibé seidauk kompleta tinan ida IX Governu hikas hapara hikas nia kontratu.
“Too ikus ami hetan konsiderasaun husi governu, VIII Governu ami hetan kontratu iha 2023 fulan-Abril, asina tinan ida de’it Ministra hapara tiha ami-nia kontratu,” Dehan Amalia Rodrigues iha edifisiu Ministeriu Edukasaun Vila Verde, Tersa (16/01).
Nia akresenta, Ministériu Edukasaun (ME) hapara kontratu sei fó impaktu ba nia oan nia eskola, hanesan faluk ida liu husi hanorin mak bele suporta ba nia oan nia eskola, tanba dadaun ne’e sai mós hanesan aman ida hodi responsabiliza ba nia oan na’in neen.
“Ninia impaktu mak hanesan nee ami la’ós mesak ami ne’e ho familia ami-nia oan ami-nia laen balun faluk, no hau faluk ha’u nia laen mate no ha’u deit mak responsabiliza ba hau-nia oan nain neen, sé ministra hapara kontratu ida ne’e fó impaktu ba hau-nia família,” Dehan Amália.
Manorin na’in sira ezije, nu’udar profesór kontratadu husi tinan 2023 husu ba Ministra Edukasaun no Governu kompetente bele rezolve sira-nia problema ne’e no sira mós bele tama engresu espesiál nune’e sira bele kontinua hanorin iha eskola bele responde sira-nia família nia nesesidade.
Dezisaun Ministra Edukasaun hodi hapara estudante la’os deit fó impaktu ba vida profesór sira maibé, fó risku ba estudante sira.
Profesór husi Eskola EBF Colina Osso-uailale/Osso-Uague, Anacleto Germano Perreira de Carvalho haktuir, hahú iha loron 6 fulan-Janeru tinan 2024 profesór sira konsege blokeia tanba MInistra Edukasaun la konsidera sira nia knaar durante ne’e.
“Iha dia 6 profesór kontratadu sira ne’ebe mak destakadu hela iha eskola refere no ami-nain 6 mak blokia duni eskola ne’ebá, tanba ami mak funda hahí husi inisiu funda no luta to’o ba edifisiu eskola,” haktuir nia.
Iha tinan kotuk Governu liuhusi MInistériu Edukasaun Juventude no Desportu fó konfiansa ba grupo komutaria harii eskola no sira asina kontratu, maibé IX Governu mosu deside hapara hikas sira nia kontratu to’o de’it 31 Dezembru 2023.