Hafoin halo aprensaun, Polisia Nasionál Timor-Leste (PNTL) no Ministériu Públiku (MP) lori sampel ai-moruk hirak ne’e ba halo ezame iha Indonézia no rezultadu pozitivu, katak ai-moruk ne’e iha poténsia hodi produs droga.

Prokuradór Jerál Repúblika (PJR), José da Costa Ximenes hatete, ai-moruk konteiner sia ho totál tonelada 162 iha ai-moruk oin 18 mak teste, rezultadu pozitivu tebes para suporta investigasaun inisiál ne’ebé halo ona.

“Rezultadu (teste) ne’ebé ita halo pozitivu potensiál ba droga”, dehan nia, iha servisu fatin, Kolmera, horisehik.

Iha fatin hanesan, Komandu PNTL, Komisáriu Júlio Hornai hateten, prosesu hotu-hotu sei iha investigasaun laran.

“Matéria ne’e apoiu tebes ba prosesu investigasaun. La'o to’o nia rohan mak ita foin hatene nia rezultadu”, tenik nia.

Nia esplika, nu’udar forsa seguransa nia papél importante atu asegura buat hotu-hotu. Iha frakeza balun ne’ebé iha, maibé instituisaun atu dezenvolve-aan hodi halo buat di'ak ba nasaun ne’e.