Públiku presiza hatene rezultadu, sera ke droga duni ou lae? Karik droga duni, presiza investigasaun kle'an inklui Alfándega mós prontu.

Karik mak lae, sira ne'ebé halo espekulasaun laiha evidénsia presiza fó esplikasaun, tanba hatudu fallansu husi parte intelijénsia hodi halo sensasaun ba média inklui konvida Badan Narkotika Nasional (BNN) Indonézia mai halo teste la ho faktu ne'ebé kredivel.

Tuir nota ne’ebé Alfándega Timor-Leste hasai katak, iha média, nasaun ne'ebé akuza supply droga ne'e mak Xina ho Singapura. Sera ke akuzasaun ba nasaun rua ne’e iha implikasaun polítika ba Timor-Leste ka lae.

Alfándega esplika, Xina - ekonomikamente jigante iha mundu, depois de Estadu Unidus Amérika (EUA). Influensia iha Áfrika no Ázia Pasífiku liu husi nia Foreign Direct Investment, inklui Timor-Leste.

Singapura - Nasaun mais avansadu ho Gross Domestic Product (GDP) no Human Development Index (HDI) tuir dadus Organizasaun Nasoins Unidas (ONU) nian aas liu iha ASEAN. Singapura sai role model iha boa governasaun iha mundu ne’ebé mós sai impedimentu ba Timor-Leste atu tama ba ASEAN.

“Reasaun saida mak sei mosu karik ita akuza nasaun rua ne'e supply droga mai Timor-Leste hodi tránzitu ba Indonézia”, deklara iha nota Alfándega nian.

Maski nune'e, desizaun hotu presiza tetu nia vantajen no dezvantajen nune'e labele iha impaktu ba Timor-Leste nia estratéjia polítika ba ASEAN iha futuru.