Komisáriu KAK, Adérito Tilman hatete, sira halo ona averiguasaun ba dokumentu sira ne’ebé Ministru Turizmu ho Vise-Ministru Turizmu asina hodi foo lisensa loke atividade jogu.

Nia esplika, iha analiza dokumentu kuandu ekipa investigadór sira identifika membru governu na'in rua ne’e komete kazu krime ruma, maka foin loke ba prosesu investigasaun.

“Bainhira iha indísiu krime mak ita halo investigasaun”, dehan Adérito, iha Palásiu Governu, horisehik.

Nia dehan, tuir prosesu kódigu penál, bainhira halo identifikasaun ba dokumentu nune’e iha indísiu krime identifika ona mak notifika hodi loke prosesu investigasaun tuir dokumentu ne’ebé identifikadu.

Membru Governu na’in rua, Ministru Turizmu, Manuel Lito Vong no Vise-Ministru Turizmu, Rui Menezes, fó lisensa ba investidór Japaun no Indonézia hodi loke jogu iha Timor-Leste. Maski nune’e, asina akordu ne’e laiha koñesimentu rum aba xefe governu.

Nune’e, Primeiru Ministru, Mari Alkatiri, konsidera akordu ne’e ilegál no laiha. Ne’e duni, deside suspende ba atividade jogu ne’e, tanba la tuir lei orgánika VII Governu Konstitusionál nian.