Senior advokasia JSMP, José Moniz hatete, tuir sira-nia observasaun, durante fulan lima servisu, deputadu sira iha Parlamentu Nasional seidauk produs lei barak. Deputadu sira foin halo alterasaun ba Lei Indultu no halo aprovasaun ba Orsamentu Jeral Estadu 2024.
"Iha lejislatura foun ne'e foin mak halo diskusaun no altera lei indultu, seluk mak sira halo diskusaun no aprovasaun lei ba orsamentu tinan 2024 nian, ne’ebé iha lejislatura foun ne'e sira seidauk halo buat barak."
"Ami seidauk haree deputadu sira-nia servisu ne'ebé mak efetivu liu, tanba durante sira-nia mandatu foin mak produs lei rua: indultu no proposta lei OJE tinan 2024 ne'e. Tuir ami hatene sira foin produs lei rua ne'e, lei importante seluk laiha," dehan José ba Jornalista INDEPENDENTE, via telefone, Kinta (28/12).
Tuir nia, iha fulan lima nia laran deputadu sira la produtivu atu produz lejislasaun foun sira, tanba hahú husi sira simu posse sira-nia prioridade mak aprova lei indultu no OJE 2024.
"Ami observa sira altera lei indultu ne'e halo ema barak la konkorda, ne'ebé fó impaktu boot tebes ba sistema justisa no ninia implikasaun ba esforsu sira ne'ebé halo ba kazu korupsaun.”
Durante ne’e mós, nia dehan, deputadu iha lejislatura foun insulta malu de’it, maibé laiha produtividade ba lei sira.
"Ida-ne'e mai ita seidauk hatene sira-nia produtividade, tanba uluk iha ami-nia relatoriu sira rekomenda ba deutadu sira par sira bele halo diskusaun ida hodi hamosu lei foun sira," katak nia.
Iha parte seluk, Peskizadór Asia Justice and Rights (AJAR), Inocencio de Jesus Xavier hatete, durante fulan lima nia laran deputadu sira la preokupa hodi produs lei importante sira, maibé trata malu mak barak liu.
"Sira tama preokupa oinsa mak halo tiha Parlamentu Nasional sai tiha hanesan ema preman nia fatin no diskute malu no trata malu mak barak liu. Desde iha Governu daualu no Nono Governu halo tiha PN sai merkadu,” dehan nia.
Inocencio hatutan, deputadu sira uza poder ne’ebé povu fó ba sira hodi trata malu no insulta malu de’it.
"Sira laiha seriedade no la produtivu produz lei sira ho konfiansa ne'ebé povu atribui ba sira, maibé uza mak insulta malu," dehan nia.
