Reprezentante UNDP, iha Timor-Leste, Munkhtuya Altangerel hatete, objetivu hasoru malu ho Prezidente Parlamentu Nasionál hodi halo despedida.
“Tanba hau nia mandatu besik ramata hela loron hira tan kompleta tinan ha’at hala’o misaun iha Timor-Leste,” dehan nia, iha Parlamentu Nasionál, horisheik.
Nia hatutan, hasoru malu ikus ho Prezidente PN ne’e ko’alia parseira UNDP ho PN importante tebes hodi servisu hamutuk ba fortalesimentu nasaun espesiál ba desentralizasaun administrativa lei tolu ne’ebé aprova ona iha Parlamentu Nasionál ne’ebé hetan mós apoiu husi ekipa UNDP, nune’e mós fortalesimentu UNDP nian iha setór justisa.
“Ida-ne’e servisu ne’ebé importante, nune’e mós iha Covid-19 iha Timor-Leste, no apoiu instituisaun Timorense konsege dezenvolve serbisu,” tenik nia.
Nia kompromete, UNDP kontinua servisu hamutuk ho Parlamentu Nasionál iha lejizlatura foun mai hodi apoiu instituisaun órgaun soberania da-ruak ne’e no fortalesimentu sistema demokrátika iha Timor-Leste no importante mós ba área sira-ne’ebé presiza hetan atensaun dezenvolvimentu umanu, kombate má-nutrisaun, kombate ki’ak multimensional no fortalesimentu ekonómia.
“Área hirak ne’e ita kontinua aposta ho atensaun no ita sei kontinua servisu hamutuk ho Parlamentu Nasionál ho deputadu foun sira mai hodi kria kondisaun kuadru juridiku nesesáriu hodi mellora liu tan área sira ne’e hotu,” nia afirma.
Purtantu reprezentante rezidente Programa Nasaun Unida ba Dezenvolvimentu ne’e hala’o kna’ar iha Timor-Leste durante tinan haat hahu iha loron 19 juñu 2019 to’o termina iha juñu 2023.
