Nia dehan, husi total populasaun ne’ebé iha, hirak ne’ebé halo doasaun ran la to’o pursentu ida (1%).

“Kruz Vermelha nia hare ba iha vontáriu oferese ran ba Banku de Sangue ne'e menus los, tanba falta koñesimentu husi ita nia populasaun ne'ebé vontáriumente atu fó sira nia ran,” dehan Sekretariu iha selebrasaun loron mundial dosaun ran ho tema “Ami Moris Tanba Imi Fó,” iha Edifiusiu CVTL Formoza, Kinta (15/06).

Nia esplika, CVTL nia papel iha área mobilizasaun, sosializasaun no halo edukasaun ba ema atu ema bele volumentariumente fó sira nia ran.

Nia hatete, durante ema ne'ebé halo doasaun ran ho voluntáriumete husi estudante sira, setor privadu no instituisaun governu sira tanba ne'e CVTL kontinua fó aproximasaun ba sira kada kada tinan.

"Grupo voluntáriu ne'e, ami kontinua fó aproximasaun ba sira tinan-tinan no sira mós kolabora nafatin ho Kruz Vermella hodi suporta sira nafatin," dehan nia.

Nia dehan, durante ne'e sira halo doasaun ran iha Dili de'it no munisipiu sira, CVTL la halo. Tanba ne'e ba oin CVTL hamutuk ho Banku Nasional de Sangue ho Ministeriu Saúde atu kopera malu hodi mobiliza mós ran  husi munispiu sira seluk.

Nia akresenta, durante ne'e populasaun sira husi munisipiu atu halo doasaun  ran maibé, informasaun ba sira mak menus tebes.

Ho nune'e, sekretáriu CVTL husu ba populasaun hotu atu voluntáriumente fó ran hodi tulun ema seluk nia vida.

Iha fatin hanesan, Médiku Jeral Banku de Sangue Agustina Alves hato'o agradese ba grupo voluntáriu sira ne'ebé oferese ona sira nia no husu mós populasaun sira ne'ebé hakarak halo doasaun ran hakbesik an ba Banku de Sangue.

Nia dehan, stok ran ne'ebé dadaun ne'e iha Banku de Sangue menus tebes.

"Tanba ran turuk ida bele salva ema seluk nia vida, keta hanoin dehan buat ne'ebé hasai ran ne'e ladi'ak maibé fó mos benifisiu ba hirak ne'ebé hasai ran, tanba liu-husi ran bele salva ona ema" dehan nia.

Iha biban ne'e mos, Estudante husi AHHA Education Raul Fransisco Belo Faria hatete, antes ne'e nia mos halo ona doasaun ran dala ida liu husi prosesu lubuk ida ne'ebé salva ona ema seluk nia vida.

Tanba ne'e, nia husu ba Joven sira seluk atu ajuda hela ran ba ema seluk ne'ebé presiza duni ran.

"Husu ba kolega sira ne'ebé iha Timor laran tomak karik ema ne'ebé presiza ita nia ajuda liu husi ita nia ran, koko atu uza ita nia fuan atu Nune'e ita bele fó moris ba ita nia ajuda," nia hakotu.

Enkuantu, selebrasaun Loron Mundial Doasaun Ran partisipa estudante husi Universidade da Pas (UNPZ), Universidade Nasional Timor-Lorosa'e (UNTL), CRISTAL, Institutu Siensia no Saúde  (ICS) no AHHA Education.