“Isin rua no kaben sedu ne’e rasik, sai nu’udar bareira ne’ebé ninia implikasaun halo sira para eskola sedu ho menoridade. Hodi rezulta sira hetan difikuldades atu asesu kampu trabalho, menus produtividade, sai vulnerável, vitima ba violénsia, hetan diskriminasaun no eskluzaun sosial iha komunidade no sosiedade,” Online INDEPENDENTE sita iha komunikadu, iha pajina ofisiál Plan Internasional Timor-Leste, segunda (01/04/24).

Tuir komunikadu hatutan, pasu ida atu bele kontribui solusaun ba problema sira ne'e, iha dia 26 Marsu 2024, Plan International Timor-Leste ho Fundasaun Pátria ofisialmente lansa ona relatóriu survey daruak kona ba “Adolesente no foinsa’e feto no mane sira para eskola ho menoridade”.

Durante lansamentu, Plan Internasional Timor-Leste no Fundasaun Patria aprezenta ona rezultadu deskobrementu kona ba kauza, efeitu no konsekuensia husi adolesente no foinsa’e feto no mane sira para eskola ho minoridade.

Iha survey ne'e mós identifikadu estratejia sira ne'ebé presija implementa hodi suporta hapara kaben sedu ho minoridade.

Entretantu, partisipantes hotu ne'ebé marka prezensa iha lansamentu ida ne'e, kompostu husi Sekretária Estadu Igualdade, Diretóra Jerál Planu, Politika, Inkluzaun no Informátika husi Ministériu Edukasaun, Xefe Departamentu Saúde Adolosente no Joven, Ministériu Saúde, Plan Internasional TL nia Embaixadóra ba Hapara Impaktu Negativu Labarik Feto Isin Rua Sedu no Kaben Sedu, Cidalia Nobre Mouzinho, Administradór Postu, Líder Komunitáriu, Organizasaun Sosiedade Sivil no movementu foinsa’e sira, Reprezentantes Instituisaun sira Universitáriu sira, no mós eskolas sekundaria sira.