PM Xanana hato’o apelu ne’e bainhira halo abertura ba feira hodi komemora loron Proklamasaun Independensia Unilateral ho tema “Orgullu ba ita-nia identidade no kultura, harii futuru liberdade, justisa no esperansa”, iha Rejiaun Administrativu Espesial Oekusse-Ambeno, 23 Novembru ne’e.
“Baikenu sira, Prezidente (Repúblika) konvida eis jenerais balun sei mai. Favór ida, simu ho laran luak ba tanba buat ida iha kotuk iha ona kotuk hodi ikus mai iha futuru to‘o ita-nia oan, ita-nia beioan sira-nia beioan tán labele iha tan problema hanesan uluk,” dehan PM Xanana iha komunikadu ne’ebé INDEPENDENTE sita, Domingu (24/11).
Líder nasionál ne’e husu ba Timor-oan sira, liu-liu joven sira atu bainhira rona informasaun husi parte oioin ne‘ebé dehan katak labele tanba tenke iha justisa, tanba sira óho ida ne‘e ka ida ne‘ebá, haluha tiha tanba Timor-Leste halo rekonsialiasaun boot tebtebes ida ne‘ebé mak fó ezemplu ba mundu tomak.
“Bainhira Indonézia la mai, Amérika la faan kilat musan no aviaun. Fransa, Alemaña, Inglatera no hotu-hotu hakarak ema sira ne’e hotu ba kadeia, hotu-hotu ne‘ebé ajuda Indonézia hodi oho ita tenke ba hotu kadeia.”
“Tanba iha mundu ne’e see mak oho mak ba, see mak fó kilat la ba. Tanba ida ne‘e husu boot atu iha 26 to‘o 28 fulan ne‘e, maluk sira husi sorin balun sei mai, ita tenke hatudu Timor -Leste, povu ida ne‘e katak iha maturidade polítika, liu-liu katuas sira hatene hanoin kona-ba futuru ba sira-nia oan,” deklara PM Xanana.
Xefe Governu ne’e husu boot ba hotu-hotu atu taka tiha tilun ba ema sira ne‘ebé mak mai lohi dehan karik atu protesta ka karik atu lori ema ba kadeia.
“Ne’e duni, apelu boot ida bá Atoni sira, simu ema sira ne‘e ho laran luak tanba ita sai ezemplu boot ida ba mundu.”
Tuir Xanana se Timor-oan bele hakuak-malu ho ema sira ne’ebé uluk mai halo funu iha TL, tanba sa mak labele hakuak-malu ho Timor-oan seluk?.
Xanana hatete, komemorasaun ne’e la‘ós halo festa de‘it maibé selebra tinan 49 proklamasaun ukun rasik an unilateralmente.
“Ita selebra la’ós tanba halo festa, dansa, maibé atu halo reflesaun liu-liu sira ne’ebé mak kaer hela ukun katak povu sosa ita-nia ukun an ho raan no ruin.”
Iha fatin hanesan, Prezidente Komisaun Organizadora atuál Ministru Administrasaun Estatál (MAE), Tomas do Rosário Cabral informa, atividade sira iha Oekusse iha ninia komisaun organizadora lokál, no mós iha komisaun organizadora nasionál, servisu hamutuk hodi organiza atividade sira ne’e.
Atividade sira mak hanesan, atrasaun motór ho karreta, atividade muzikál entre suku no eskola sira no mós artista sira, iha mós feira ne’ebé organiza hosi Ministériu Komérsiu no Indústria.
Tanba ne’e, agradese ba parte hotu-hotu ne’ebé kontribui ba eventu boot ida ne’e no agradese bá embaixada ho konsuladu Indonézia iha TL, ne’ebé fasilita fronteira atu sasan sira bele tama mai.
Adolmando hein joven hatudu matenek
Tuir Reitor Universidade da Paz (UNPAZ), Adolmando Soares Amaral, prezensa eis lider milisia pro-Indonezia, Eurico Guteres, iha Timor-Leste iha serimonia Proklamasaun Independensia Unilateral, 28 Novembru, sei iha impaktu ba joven sira atu espresa sira-nia matenek iha públiku.
“Ha’u hanoin moris iha nasaun demokrátiku pro no kontra ne’e normál, Eurico (Guteres) atu mai mós tasi sei la sa’e ida, Timor la lakon ida, nia so mai par depois Timor ne’e viral liu tan iha media sosiál, koalia pro no kontra, ataka, depois halo matenek liu tan, tanba ema sira moris iha (tinan) 2000 sira la hatene.”
“Eurico mai nia impaktu uitoan ba joven sira par sira hatudu sira-nia kriatividade tanba iha momentu ida ne’e sira hotu hakarak empresa mesmu momentu ne’ebá balun seidauk moris,”dehan nia ba jornalista INDEPENDENTE, iha nia knaar fatin, Sesta (22/11).
Tuir nia, kuandu nasaun ida atu ukun an mak laiha pro no kontra, nasaun refere labele ukun an. Tanba ida ne’e, tenke hatene katak iha grupu rua ne’ebé pro no kontra mak ohin TL sai nasaun demokrariku.
“Ema sira ne’e ema Timor, moris iha ne’e, uma lisan iha ne’e, sira-nia raan fakar iha ne’e, komu kestaun politika Timor-Leste hakarak ukun an, prontu sira tenke hetan konsekuensia halai ba iha ne’ebá, Indonezia, tanba se iha momentu ne’e mak sira la halai, iha ne’e de’it, Indonezia la sai husi ne’e.”
“Agora, sira ne’ebé mak liman raan ba povu no rai ida ne’e, sira ne’e mak ita tenke tetu no haree didi’ak, mais sira ne’ebé mak sai vitima ba politika husi ema na’in hira ne’ebé mak hakarak ida ne’e, hakarak ida ne’ebá, ita haree tanba povu no rai ida ne’e la sala,”dehan nia.
