Ministra Edukasaun, Dulce de Jesus Soares hatete, EBC Sergio Vieira de Melo tama mós iha eskola 34 ne’ebé afeitadu ba inundasaun iha tinan 2021.
Nune’e, Ministeriu edukasaun hamutuk ho UNICEF apoiu, hodi rekoopera fila fali fasilidade eskola ne’ebé durante ne’e hetan estragus.
“Ohin Ministeriu Edukasaun simu doasaun husi Embaixada Xina liu husi UNICEF hodi entrega ba EBC Sergio Vieira de Melo, hanesan kadeira, meza, armari, kuadru, lapiz kores no kadernu hodi apoiu sira nia prosesu aprendijazem,”dehan nia iha EBC Segio Vieira de Melo, Bekora, Dili, (26/11/24).
Ministra Edukasaun hatutan, lori Governu Timor- Leste naran hato’o agradese ba UNICEF ho Embaixadór Xina ne’ebé sai parseiru durante tinan naruk ona ho Ministeriu Edukasaun hodi apoia Ministeriu Eduksaun iha área oioin, iha dezenvolvimentu kurikulum, formasaun ba professors, inklui mós infraestrutura.
Iha fatin hanesan, Embaixadora Xina iha Timor-Leste Wang Wenli hatete,Governu Xina ho Governu Timor-Leste iha parséria ne'ebé di’ak tebes. tanba ne'e koperasaun entre Governu Xina ho Ministeriu Edukasaun liu husi UNICEF sei lori benifisia barak ba estudante iha Timor-Leste.
“Edukasaun ne'e mak baze ida ba labarik sira nia moris, ita hare mós katak parseria entre nasaun rua ne'e, benefisia tebes ba labarik barak iha Timor-Leste no material hirak ne'ebé apoiu husi Governu Xina liu husi jestaun UNICEF ho montante dolar amerikanu milaun $1 resin, hodi kobre hotu eskola 34 ne'ebé hetan afetadu husi inundasaun,”dehan Embaixadora Xina Wang Wenli.
Entretantu, Reprezentante UNICEF iha Timor-Leste, Patrizia Digiovanni, sente onradu tebes servisu hamutuk ho Governu Timor-Leste liuliu ho Ministeriu Edukasaun atu bele ultrapasa dezafiu hirak ne'ebé estudante sira enfrenta durante akontese dezastre naturais.
“Ita hare mudansa klimatika ne’e sei akontese, buat barak hanesan dezastre inundasaun, tanba ne’e la’ós atau hadi’a de’it kualidade edukasaun, maibé ita mós pronto atu hasoru dezastre naturais iha futuru,"dehan Patrizia.
Enkuantu, tuir dadus, material ne’ebé ME ho UNICEF apoiu ba eskola 34 ne’ebé afeitadu ba inundasaun iha tinan 2021, ne’ebé iha Munisipiu Bobonaro, Kovalima, Dili no Manufahi mak hanesan, kadeira ba alunu 2.000, kadeira no meza ba professor hamutuk 204, no livru 2024 inklui sasan sira seluk.
