“Momentu ida ne'e, sai momentu ida oportunu tebes ba ita hotu atu selebra no rekoñese esforsu no dedikasaun estudante sira nian. Ita nia rai Timor presija tebes kualifikasaun iha rekursus humanus ne'ebé adekuadu, atu bele kompete iha kampo traballu,” dehan Ministru José liu husi nia diskursu iha ambitu yudisium ba finalista UNTL na’in 278, iha Salaun OKA, Osindo, Dili, Segunda (25/11/24).
Governante ne’e hatutan, Timor-Leste persija kontinua investe ho firme iha área edukasaun, iha kualifikasaun profisional, iha kursus ida ne'ebé bele garante servisu ba foinsa’e sira iha futuru. Tanba ne’e, Ministru hato’o agradementu ba dekano, professor, no estrutura tomak iha fakuldade siencias sosiais ne'ebe tinan barak oferese sira nia-aan eduka Timor oan lubuk ida ne’ebé akumula sira nia estudu iha fakuldade siencias sosiais.
Iha biban ne’e Ministru mós hakarak felisita estudante finalista sira hotu ne'ebé iha tinan tolu ou neen liu bá, hili ona kursu iha Universidade ida ne'e, hodi hala’o sira nia estudu no hanoin ho dedikasaun maka’as, sira konsege to’o duni formasaun nia rohan.
“Agradese ba Professor sira hotu ne'ebé komprimenta sira nia-aan, hanorin siensias sosiais diak ba ita nia rain, tanba liu husi siensias sosiais bele komprende dinamika sosial, bele komprende politika, bele komprende ekonomia, bele hatene politika publikas ne'ebé diak, atu bele dezenvolve ita nia rain,”
Nia haktuir, siensias sosiais iha papel estratejiku atu aborda dezafius ho temporariu sira hanesan inkluzaun sosial, fortelesimentu instituisaun no instituisaun demokratiku sira, ne’ebé fó impaktu mudansa ba komunidade no governu liu husi Ministeriu Ensinu Superior Siensia no Kultura.
Nune’e mós, Ministru dehan, hakarak fó prioridade ba investigasaun, inovasaun fortelesimentu iha iha setór ensinu superior ne’ebé aliñadu ho planu estratejiku dezenvolvimentu nasional 2011/2030 ho objetivu dezenvolvimentu sustentavel iha Timor-Leste.
Tanba ne’e, Governante ne’e husu ba finalista sira atu uza sira nia matenek ajuda sosiedade atu bele dezenvolve diak liu tan nasaun.
Ministru mós hato’o parabens ba inan aman sira ne’ebé tau konfiansa ba UNTL hodi eduka oan sira no mós sira nia apoiu no dedikasaun, ohin loron oan sira bele hetan rezultadu ne’ebé diak.
“Ha’u hato’o ha’u nia kumprementus no parabens ba inan-aman sira, tanba ita boot sira bele tau konfiansa ba UNTL liuliu faKuldade siensias sosiais, hodi eduka ita boot sira nia oan, ohin bele tama ona iha faze judisiariu, ne'e importante,”tenik Ministru.
Iha fatin hanesan, Dekanu FCS-UNTL, Alarico da Costa Ximenes hatete, Total finalista husi departamentu hitu ne’ebé tuir ona yudisium hamutuk na’in 278, ne’ebé kompostu husi feto na’in 150 no mane na’in 118.
Tanba ne’e, Dekanu husi Fakuldade siensia sosiais ne’e apela ba finalist sira atu uza aplika kuiñesimentu ne’ebé sira iha atu bele hadia nasaun no Estadu.
